جہلم: وزیراعلیٰ پنجاب مریم نواز شریف کے ویژن "سڑکیں بحال، پنجاب خوشحال” پروگرام کے تحت جہلم جی ٹی روڈ سے سی او ڈی کالا تک پانچ کلو میٹر طویل کارپٹ سڑک کی تعمیر مکمل کر لی گئی ہے، جس پر دس کروڑ انسٹھ لاکھ روپے کی لاگت آئی۔ یہ منصوبہ مقررہ وقت میں مکمل کیا گیا۔
شہریوں نے اس اقدام کو سراہتے ہوئے اخبار نویسوں سے گفتگو کرتے ہوئے کہا کہ دیہی علاقوں کی سڑکوں کی کارپٹ تعمیر سے نہ صرف پائیدار ترقی کے نئے دروازے کھلیں گے بلکہ دیہاتوں میں بسنے والوں کو تعلیم اور صحت کی جدید سہولتوں تک آسان رسائی حاصل ہوگی۔
انہوں نے مزید کہا کہ وزیراعلیٰ پنجاب کے ویژن کے تحت دیہاتی علاقوں میں ترقی کی نئی راہیں کھلیں گی اور ان منصوبوں سے پنجاب کی تقدیر بدل جائے گی، جس سے دیہی عوام کی ترقی اور خوشحالی پر مثبت اثرات مرتب ہوں گے۔
علاقہ مکینوں نے وزیراعلیٰ پنجاب محترمہ مریم نواز شریف، ڈپٹی کمشنر سید محمد میثم عباس اور محکمہ ہائی وے ڈویژن جہلم کا شکریہ ادا کیا جن کی کوششوں اور محنت سے یہ کارپٹ روڈ منصوبہ مقررہ مدت میں مکمل ہوا۔
