جہلم شہر سمیت ضلع بھر میں ہوٹلوں پر سرکاری نرخوں کے مطابق مینو اور ریٹ لسٹیں آویزاں نہ کرنے پر شہریوں نے شدید احتجاج کرتے ہوئے ڈپٹی کمشنر سے فوری نوٹس لینے کا مطالبہ کر دیا۔
تفصیلات کے مطابق جہلم شہر اور گردونواح میں ہوٹل مالکان نے سرکاری نرخوں کی دھجیاں اڑاتے ہوئے اپنی مرضی کے ریٹ مقرر کر رکھے ہیں، جس کے باعث شہریوں کو مہنگائی کے اس دور میں اضافی قیمتوں کی ادائیگی پر مجبور ہونا پڑ رہا ہے۔
شہریوں کا کہنا ہے کہ مختلف کھانوں سمیت باربی کیو، تکہ، سیخ کباب، لیگ اور چیسٹ پیس سمیت دیگر اشیاء پر بلاوجہ منہ مانگی قیمتیں وصول کی جارہی ہیں۔ متعدد ہوٹلز اور باربی کیو شاپس پر کسی قسم کا سرکاری نرخ نامہ آویزاں نہیں کیا جاتا، جس سے صارفین کو لوٹنے کا سلسلہ معمول بن چکا ہے۔
عوامی حلقوں، سماجی تنظیموں اور سول سوسائٹی نے ڈپٹی کمشنر جہلم سے مطالبہ کیا ہے کہ فوری کارروائی عمل میں لائی جائے، سرکاری نرخ نامہ تمام ہوٹلز، ریسٹورنٹس اور فوڈ پوائنٹس پر نمایاں جگہ پر آویزاں کروایا جائے اور سخت مانیٹرنگ کی جائے تاکہ عوام کو ریلیف مل سکے اور صحت مند و معیاری خوراک مناسب قیمتوں پر میسر آ سکے۔
