دینہ: جی ٹی روڈ سبزی منڈی کے ساتھ لیاقت ٹاؤن جانے والے روڈ محلہ فیضان مدینہ میں نکاسی آب کا سنگین مسئلہ شدت اختیار کر گیا ہے۔ گلیوں اور کھلے مقامات پر گندہ پانی جمع ہونے سے نہ صرف آمدورفت میں مشکلات پیش آ رہی ہیں بلکہ بدبو اور مچھروں کی افزائش نے علاقہ مکینوں کی زندگی اجیرن بنا دی ہے۔
علاقہ مکینوں کا کہنا ہے کہ گلیوں کے کچا ہونے کی وجہ سے سیوریج کا کوئی نظام موجود نہیں، جس کے باعث بارش اور گندہ پانی جمع ہو کر وبائی امراض کو جنم دے رہا ہے۔ بزرگ، بچے اور نوجوان مختلف بیماریوں میں مبتلا ہو رہے ہیں، جبکہ گھروں میں داخل ہونا اور روزمرہ معمولات زندگی انجام دینا بھی مشکل ہو چکا ہے۔
اہل علاقہ نے وزیراعلیٰ پنجاب محترمہ مریم نواز، ڈپٹی کمشنر جہلم اور اسسٹنٹ کمشنر دینہ سے فوری نوٹس لینے کا مطالبہ کیا ہے تاکہ نکاسی آب کے اس سنگین مسئلے کو مستقل بنیادوں پر حل کیا جا سکے اور شہری بھی وزیراعلیٰ پنجاب کے ویژن کے مطابق صاف ستھرے اور صحت مند ماحول میں زندگی گزار سکیں۔
