سوہاوہ کے علاقے ڈومیلی میں گائے کو کلہاڑی کے وار سے زخمی کرنے والے ملزم کو پولیس نے گرفتار کر لیا۔
تفصیلات کے مطابق جہلم کی تحصیل سوہاوہ میں ایس ایچ او تھانہ ڈومیلی ملک عدیل اور پولیس ٹیم نے بروقت کارروائی کرتے ہوئے گائے کو کلہاڑی کے وار سے زخمی کرنے والے ملزم کو گرفتار کر لیا۔ واقعہ افتخار نامی شخص کی جانب سے پیش آیا جو پنگروٹ کا رہائشی ہے۔
پولیس کے مطابق افتخار نے ایک روز قبل اپنی فصل میں جانے پر گائے کو کلہاڑی کے وار کر کے زخمی کر دیا تھا۔ واقعہ کی خبر جب سوشل میڈیا پر وائرل ہوئی تو ایس ایچ او تھانہ ڈومیلی ملک عدیل نے فوری نوٹس لیتے ہوئے ٹیم کے ہمراہ کارروائی کی اور ملزم کو گرفتار کر کے اس کے خلاف مقدمہ درج کر لیا۔
ڈسٹرکٹ پولیس آفیسر جہلم طارق عزیز سندھو نے اس واقعے پر اظہار افسوس کرتے ہوئے کہا کہ جانور بھی احساس رکھتے ہیں، ان پر ظلم کسی صورت برداشت نہیں کیا جائے گا۔ انہوں نے مزید کہا کہ بے زبان جانوروں پر تشدد کرنے والوں کو قانون کے کٹہرے میں لایا جائے گا تاکہ مستقبل میں ایسے واقعات کی روک تھام ممکن بنائی جا سکے۔
