جہلم پولیس نے ضلع بھر میں پیشہ ور بھکاریوں کے خلاف بھرپور کریک ڈاؤن کرتے ہوئے 7 ملزمان کو گرفتار کر لیا۔
ڈسٹرکٹ پولیس آفیسر جہلم طارق عزیز سندھو کی ہدایت پر مختلف علاقوں میں کارروائیاں تھانہ دینہ، کالا گجراں اور تھانہ سٹی پولیس نے کیں۔
تھانہ دینہ پولیس نے کارروائی کرتے ہوئے 2 بھکاریوں کو گرفتار کیا، کالا گجراں پولیس نے 1 بھکاری کو حراست میں لیا جبکہ تھانہ سٹی پولیس نے مختلف علاقوں میں کارروائی کرتے ہوئے 4 بھکاریوں کو گرفتار کر کے ان کے خلاف قانونی کارروائی شروع کر دی۔
ڈی پی او جہلم طارق عزیز سندھو نے اس موقع پر کہا کہ پیشہ ور بھکاری ناصرف مختلف شاہراؤں، چوکوں اور چوراہوں پر ٹریفک کی روانی میں رکاوٹ بنتے ہیں بلکہ بعض اوقات حادثات کا بھی سبب بنتے ہیں، اسی لیے ان کے خلاف سخت کارروائی عمل میں لائی جا رہی ہے۔
انہوں نے مزید کہا کہ شہری پیشہ ور بھکاریوں کی حوصلہ شکنی کریں اور کسی بھی مقام پر اس طرح کی سرگرمی دیکھنے کی صورت میں پولیس کو اطلاع دیں تاکہ بروقت کارروائی کی جا سکے۔
