جہلم: پنجاب فوڈ اتھارٹی جہلم نے ناقص اور ملاوٹی دودھ فروخت کرنے والوں کے خلاف کارروائیاں تیز کر دی ہیں۔ پنجاب فوڈ اتھارٹی نے 2 ہزار لیٹر ملاوٹی دودھ تلف کر دیا۔
ترجمان کے مطابق کارروائیاں ٹول پلازہ، سوہاوہ، دینہ اور جادہ چنگی کے مقامات پر ناکے لگا کر کی گئیں۔
کارروائی کے دوران 7 دودھ بردار گاڑیوں میں موجود 26 ہزار لیٹر دودھ کو چیک کیا گیا، جس میں سے 2 ہزار لیٹر پانی ملا اور ناقص معیار کا دودھ موقع پر تلف کردیا گیا۔
فوڈ اتھارٹی حکام نے ناقص دودھ سپلائی کرنے پر 4 گاڑیوں کو مجموعی طور پر 1 لاکھ 25 ہزار روپے جرمانہ عائد کیا۔ ترجمان کے مطابق یہ اقدامات عوام کو خالص اور معیاری خوراک کی فراہمی یقینی بنانے کے لیے کیے جا رہے ہیں۔
فوڈ اتھارٹی نے شہریوں سے اپیل کی ہے کہ ملاوٹ مافیا کی نشاندہی کریں تاکہ مضر صحت دودھ اور دیگر اشیائے خور و نوش کے خلاف کارروائیوں کو مزید مؤثر بنایا جا سکے۔
