دینہ: ڈپٹی کمشنر جہلم میثم عباس نے کہا ہے کہ "تحصیل دینہ سمیت ضلع بھر میں تمام اقسام کی تجاوزات کو فوری طور پر ختم کیا جائے، شہریوں کی سہولت اور راستوں کی روانی کے لیے تجاوزات کا خاتمہ ناگزیر ہو چکا ہے۔ تجاوزات کے خلاف دوبارہ آپریشن شروع کیا جا رہا ہے اور اس سلسلے میں کسی کو بھی رعایت نہیں دی جائے گی۔”
انہوں نے ان خیالات کا اظہار اسسٹنٹ کمشنر دینہ کے ہمراہ مین بازار دینہ کے دورے کے دوران کیا۔ ڈپٹی کمشنر نے بازار میں قائم مختلف دکانوں کی تجاوزات کا خود مشاہدہ کیا اور موقع پر ہی برہمی کا اظہار کرتے ہوئے متعلقہ حکام کو فوری ایکشن کی ہدایت کی۔
ڈی سی میثم عباس نے مزید کہا کہ "نالوں کے اوپر قائم پختہ اور عارضی تجاوزات بھی فوری ہٹا دی جائیں، تاکہ مون سون سے قبل نکاسی آب کا نظام بہتر بنایا جا سکے۔ صفائی اور نکاسی آب کی راہ میں حائل تمام رکاوٹیں دور کرنا ہماری ترجیحات میں شامل ہے۔”
انہوں نے واضح کیا کہ "شہریوں کو سہولت دینا ہمارا فرض ہے، اور اس کے لیے تجاوزات کا مکمل خاتمہ یقینی بنایا جائے گا۔ عملدرآمد میں غفلت یا کوتاہی برداشت نہیں کی جائے گی۔”
