جہلم: ڈپٹی کمشنر جہلم میر رضا اوزگن کی زیر صدارت پرائس کنٹرول مجسٹریٹس کی کارکردگی کا اہم اجلاس منعقد ہوا۔
اجلاس میں آنے والے مقدس مہینے رمضان المبارک کے دوران اشیائے خوردونوش کی قیمتوں کو قابو میں رکھنے اور گراں فروشوں کے خلاف کریک ڈاؤن کا جائزہ لیا گیا۔
ڈپٹی کمشنر نے واضح کیا کہ ماہِ صیام میں عوام کو ریلیف فراہم کرنا انتظامیہ کی اولین ترجیح ہے اور اس میں کسی قسم کی کوتاہی برداشت نہیں کی جائے گی۔
ڈپٹی کمشنر جہلم میر رضا اوزگن نے چیکنگ کا ٹارگٹ پورا نہ کرنے اور کارکردگی میں پیچھے رہنے والے پرائس مجسٹریٹس پر سخت اظہار برہمی کیا اور ان سے فوری وضاحت طلب کر لی۔
انہوں نے ہدایت کی کہ رمضان المبارک کی آمد سے قبل تمام مارکیٹوں میں ریٹ لسٹوں کی موجودگی اور ذخیرہ اندوزوں کے خلاف قانونی کارروائی کو حتمی شکل دی جائے۔ جو افسران ٹارگٹ پورا کرنے میں ناکام رہے، انہیں اپنی فیلڈ کارکردگی بہتر بنانے کے لیے آخری وارننگ جاری کی گئی۔
ڈپٹی کمشنر جہلم میر رضا اوزگن نے مزید کہا کہ رمضان المبارک کے دوران گراں فروشی اور خود ساختہ مہنگائی کرنے والوں کے خلاف آہنی ہاتھوں سے نمٹا جائے گا۔
انہوں نے تجاوزات اور گراں فروشی کے خاتمے کے لیے پنجاب انفورسمنٹ اینڈ ریگولیٹری اتھارٹی (PERA) کو الرٹ رہنے کا حکم دیا تاکہ شہریوں کو خریداری میں کوئی دشواری پیش نہ آئے۔ ضلعی انتظامیہ روزانہ کی بنیاد پر قیمتوں کی مانیٹرنگ کرے گی تاکہ عوام کو ہر صورت مقررہ نرخوں پر معیاری اشیاء کی فراہمی یقینی بنائی جا سکے۔
