جہلم: ڈپٹی کمشنر جہلم سید محمد میثم عباس نے کہا ہے کہ دریائے جہلم میں پانی کا بہاؤ معمول کے مطابق ہے اور کسی قسم کے سیلاب کا کوئی خدشہ نہیں۔ ضلعی انتظامیہ صورتِ حال پر مکمل نظر رکھے ہوئے ہے۔
ڈپٹی کمشنر نے دریائے جہلم میں پانی کی صورتحال کا معائنہ کرتے ہوئے واسا اور راولپنڈی ویسٹ مینجمنٹ کمپنی کے افسران کو ہدایت کی کہ اربن فلڈنگ کے مسئلے سے نمٹنے کے لیے ہنگامی اقدامات عمل میں لائے جائیں۔
انہوں نے شہریوں سے اپیل کی کہ وہ کسی بھی قسم کی افواہوں پر یقین نہ کریں اور صرف ضلعی انتظامیہ کے مستند ذرائع سے ہی معلومات حاصل کریں۔ انتظامیہ شہریوں کو منگلا ڈیم اور دریائے جہلم کی صورتحال سے لمحہ بہ لمحہ آگاہ کرتی رہے گی۔
ڈپٹی کمشنر نے شہریوں کو تنبیہ کی کہ وہ دریا میں نہانے، کشتی رانی کرنے یا دریا کو پار کرنے کی کوشش نہ کریں تاکہ کسی ناخوشگوار واقعے سے بچا جا سکے۔
دریں اثناء ایڈیشنل ڈپٹی کمشنر شمس الرحمن نے ڈپٹی کمشنر کی ہدایت پر جہلم شہر میں نکاسی آب کے جاری کاموں کا جائزہ لیا اور موقع پر کھڑے ہو کر امدادی سرگرمیوں کی نگرانی کی۔ ریسکیو 1122، سول ڈیفنس، میونسپل کمیٹی، ڈسٹرکٹ کونسل اور دیگر متعلقہ اداروں کے ملازمین فیلڈ میں موجود ہیں اور نکاسی آب کے عمل کو تیز کرنے میں مصروف ہیں۔
