جہلم پولیس نے شہری کے گھر میں زبردستی داخل ہو کر قبضہ کرنے کے مقدمہ میں مطلوب اشتہاری مجرم کو گرفتار کر لیا۔
جہلم پولیس کے ترجمان کے مطابق جہلم میں ایس ایچ او تھانہ کالا گجراں اور ان کی ٹیم نے مؤثر کارروائی کرتے ہوئے مقدمہ میں مطلوب اشتہاری ملزم کو ٹریس کر کے گرفتار کیا۔ ملزم کافی عرصے سے قانون کی گرفت سے بچنے کے لیے روپوش تھا۔
پولیس حکام کا کہنا ہے کہ جدید سائنٹیفک طریقۂ تفتیش اور خفیہ معلومات کی مدد سے ملزم کی موجودگی کا سراغ لگایا گیا اور کامیاب کارروائی کے دوران اسے گرفتار کر لیا گیا۔
ملزم کے خلاف قانونی کارروائی مکمل کرتے ہوئے مزید تفتیش جاری ہے، جبکہ اسے عدالت میں پیش کرنے کے لیے ضروری اقدامات بھی کیے جا رہے ہیں۔
ڈسٹرکٹ پولیس آفیسر (ڈی پی او) جہلم شفیق احمد چوہدری نے کہا ہے کہ جہلم پولیس اشتہاری مجرمان، قبضہ مافیا اور قانون شکن عناصر کے خلاف بلاامتیاز کارروائیاں جاری رکھے ہوئے ہے۔
انہوں نے کہا کہ شہریوں کے جان و مال، عزت اور املاک کا تحفظ پولیس کی اولین ذمہ داری ہے اور کسی بھی شخص کو قانون ہاتھ میں لینے یا دوسروں کی جائیداد پر ناجائز قبضہ کرنے کی اجازت نہیں دی جائے گی۔
ڈی پی او نے واضح کیا کہ قبضہ مافیا اور جرائم پیشہ عناصر کے خلاف کریک ڈاؤن مزید تیز کیا جائے گا تاکہ شہریوں کو تحفظ اور انصاف کی فراہمی یقینی بنائی جا سکے۔
