سوہاوہ پولیس نے دو الگ الگ کارروائیوں میں چوری کے مقدمے میں ملوث ایک ملزم اور سال 2021 سے سرقہ بالجبر کے مقدمے میں مطلوب ایک اشتہاری مجرم کو گرفتار کر لیا۔
ترجمان جہلم پولیس کے مطابق ایس ایچ او تھانہ سوہاوہ اور ان کی ٹیم نے کارروائی کرتے ہوئے چوری کے مقدمے میں ملوث ملزم کو گرفتار کیا، جس کے قبضے سے چار تولہ سونا اور 30 ہزار روپے نقد، جو مبینہ طور پر چوری شدہ تھے، برآمد کر لیے گئے۔ پولیس کا کہنا ہے کہ ملزم سے مزید تفتیش جاری ہے۔
ایک اور کارروائی میں تھانہ سوہاوہ پولیس نے سال 2021 سے سرقہ بالجبر کے مقدمے میں مطلوب ایک اشتہاری مجرم کو گرفتار کر لیا۔ ترجمان کے مطابق پولیس نے جدید سائنسی طریقہ تفتیش اور پیشہ ورانہ حکمت عملی کے ذریعے ملزم کو ٹریس کر کے گرفتار کیا۔
پولیس کے مطابق اشتہاری مجرم سرقہ بالجبر کی واردات کے دوران ایک شہری کو فائرنگ کر کے زخمی کرنے کے مقدمے میں مطلوب تھا اور گرفتاری سے بچنے کے لیے مسلسل روپوش رہا۔
ڈی پی او جہلم شفیق احمد چوہدری نے کہا کہ شہریوں کے جان و مال کا تحفظ جہلم پولیس کی اولین ترجیح ہے اور جرائم پیشہ عناصر کے خلاف بلاامتیاز کارروائیاں جاری رہیں گی۔ انہوں نے کہا کہ اشتہاری مجرمان اور قانون شکن عناصر کو قانون کے کٹہرے میں لانے کے لیے تمام دستیاب وسائل بروئے کار لائے جا رہے ہیں تاکہ شہریوں کو محفوظ ماحول فراہم کیا جا سکے۔
