برطانیہ کا ورک ویزا کیسے حاصل کریں؟

اسکلڈ ورکر ویزا (Skilled Worker Visa) غیر ملکی شہری کو برطانیہ جانے یا قیام کرنے کی اجازت دیتا ہے تاکہ وہ تصدیق شدہ ملازمت فراہم کرنے والی کمپنی کے ہاں نوکری کر سکے۔

اسکلڈ ورکر ویزا نے ’ٹائر 2 (جنرل) ورک ویزا‘ کی جگہ لے لی ہے اور یہ غیر ملکیوں کو برطانیہ میں کام کرنے کی بھی اجازت دیتا ہے۔ درخواست دہندہ کو ’یو کے اسکپڈ ورکر ویزا‘ حاصل کرنے کیلیے اہلیت کے مختلف تقاضوں کو پورا کرنا لازمی ہے۔

مذکورہ ویزا حاصل کرنے کیلیے آپ کے پاس ملازمت دینے والے کی جانب سے آفر لیٹر ہونا چاہیے جو ہوم آفس سے منظور شدہ ہو۔

ملازمت فراہم کرنے والے کی جانب سے سرٹیفکیٹ آف سپانسرشپ (سی او ایس) بھی ہونا چاہیے جس میں یہ واضح کیا گیا ہو کہ آپ کو کس طرح کی نوکری کی پیشکش کی گئی ہے۔

کام کی نوعیت اور سی او ایس ملنے کی تاریخ کے حساب سے آپ کو کم از کم تنخواہ ادا کی جانی چاہیے۔

اسکلڈ ورکر ویزا حاصل کرنے کیلیے آپ کو انگریزی زبان بولنے، پڑھنے، لکھنے اور سمجھنے کے قابل ہونا چاہیے۔ درخواست جمع کرواتے وقت انگریزی میں قابلیت کو ثابت کرنا ضروری ہے۔

اسکلڈ ورکر ویزا پر قیام کا دورانیہ

مذکورہ ویزا حاصل کرنے والا شخص توسیع سے قبل 5 سال تک برطانیہ میں قیام کر سکتا ہے۔ ویزا کی میعاد ختم ہونے پر یا پھر نوکری تبدیل کرتے وقت توسیع یا اپ ڈیٹ کرنے کیلیے درخواست دینی ہوگی۔

ویزا کے اخراجات

اسٹینڈرڈ ویزا درخواست کی فیس 719 سے 1639 پاؤنڈز ہے تاہم ہر سال 1035 پاؤنڈز ہیلتھ کیئر سرچارج ادا کرنے ہوں گے۔ برطانیہ پہنچنے پر بینک اکاؤنٹ میں کم از کم 1270 پاؤنڈز کا ہونا ضروری ہے۔

اگر ملازمت امیگریشن کی تنخواہ کی فہرست میں ہے تو درخواست کی کم فیس ادا کریں گے۔

کم از کم تنخواہ

اسکلڈ ورکر ویزا حاصل کرنے کی شرط کم از کم سالانہ تنخواہ 38،700 پاؤنڈز ہے۔ تاہم امیگریشن سیلری لسٹ ملازمتوں کی وہ فہرست ہے جس میں کم از کم تنخواہ کی شرط نرم ہے۔

اگر امیگریشن سیلری لسٹ میں موجود ملازمت کیلیے اسپانسر کیا جا رہا ہے تو کم از کم سالانہ تنخواہ 30،960 پاؤنڈز ہے۔