جہلم کی تاریخ میں پہلی بار ڈپٹی کمشنر جہلم میر رضا اوزگن کی ہدایت پر ضلعی انتظامیہ جہلم کے زیرِ اہتمام طلبہ و طالبات اور گریجویٹس کو مقابلے کے امتحان سی ایس ایس (CSS) کی تیاری، سول سروس کے تقاضوں اور کامیابی کے موثر طریقہ کار سے آگاہ کرنے کے لیے لاجپت رائے لائبریری جہلم میں مفت سی ایس ایس اورینٹیشن سیمینار کا انعقاد کیا گیا۔
سیمینار کی قیادت اسسٹنٹ کمشنر انڈر ٹریننگ محمد عبداللہ راجہ (52 کامن) نے کی، جبکہ 54 کامن گروپ کے 10 زیرِ تربیت سول سروس افسران نے بطور مقرر شرکت کرتے ہوئے شرکاء کو سی ایس ایس امتحان اور سول سروس کے حوالے سے تفصیلی رہنمائی فراہم کی۔
سیمینار میں ضلع جہلم کے مختلف تعلیمی اداروں سے تعلق رکھنے والے طلبہ و طالبات اور گریجویٹس نے بھرپور شرکت کی۔ مقررین نے شرکاء کو سی ایس ایس امتحان کی تیاری، اختیاری مضامین کے انتخاب، معیاری مطالعہ، وقت کے مؤثر استعمال، تحریری امتحان، نفسیاتی جانچ، انٹرویو، شخصیت سازی اور سول سروس میں پیشہ ورانہ ذمہ داریوں کے حوالے سے جامع بریفنگ دی۔
اس موقع پر شرکاء نے مختلف سوالات بھی کیے، جن کے مقررین نے تفصیلی جوابات دیے۔ زیرِ تربیت افسران نے اپنے ذاتی تجربات اور کامیابی کے مراحل سے بھی نوجوانوں کو آگاہ کیا تاکہ انہیں سی ایس ایس امتحان کی تیاری کے حوالے سے عملی رہنمائی حاصل ہو سکے۔
مقررین نے کہا کہ سول سروس میں کامیابی کے لیے مستقل مزاجی، نظم و ضبط، تحقیق پر مبنی مطالعہ، وقت کا درست استعمال اور مثبت سوچ بنیادی اہمیت رکھتے ہیں۔ انہوں نے نوجوانوں پر زور دیا کہ وہ اپنے مقصد کا واضح تعین کرتے ہوئے منظم انداز میں تیاری کریں اور ناکامی سے گھبرانے کے بجائے اپنی کمزوریوں پر قابو پانے کی مسلسل کوشش کریں۔
سیمینار کے دوران نوجوانوں کو لاجپت رائے لائبریری جہلم کی دستیاب علمی سہولیات سے بھرپور استفادہ کرنے کی ترغیب بھی دی گئی۔ مقررین نے بتایا کہ لائبریری مسابقتی امتحانات کی تیاری، تحقیق، مطالعہ اور دیگر علمی سرگرمیوں کے لیے ایک مفید اور موزوں مرکز ثابت ہو سکتی ہے۔
سیمینار کے اختتام پر شرکاء نے ضلعی انتظامیہ جہلم کے اس منفرد اقدام کو سراہتے ہوئے اسے نوجوانوں کی تعلیمی، پیشہ ورانہ اور مستقبل کی منصوبہ بندی کے حوالے سے انتہائی مفید قرار دیا۔
اس موقع پر اس عزم کا اظہار کیا گیا کہ نوجوانوں کی استعدادِ کار میں اضافے، انہیں سول سروس اور دیگر مسابقتی امتحانات کے لیے تیار کرنے اور ان کی رہنمائی کے لیے مستقبل میں بھی اس نوعیت کے مفت رہنمائی پروگرامز اور اورینٹیشن سیمینارز کا سلسلہ جاری رکھا جائے گا۔
