جہلم: ڈپٹی کمشنر جہلم میر رضا اوزگن کی زیر صدارت ضلع میں صفائی ستھرائی کے انتظامات کا جائزہ لینے کے لیے ایک اہم اجلاس منعقد ہوا جس میں متعلقہ افسران نے شرکت کی۔
اجلاس میں ایڈیشنل ڈپٹی کمشنر ریونیو سنیہ صافی، اسسٹنٹ کمشنر جہلم آفتاب اشرف، چیف آفیسر میونسپل کمیٹی و ضلع کونسل ضیاء اللہ رانجھا، ڈسٹرکٹ مینیجر علی اور دیگر نمائندگان موجود تھے۔ اجلاس کا مقصد شہر میں صفائی کے نظام کو مزید بہتر بنانا اور کوڑا کرکٹ کی بروقت منتقلی کے عمل کا جائزہ لینا تھا۔ اس موقع پر ڈسٹرکٹ مینیجر علی نے ڈپٹی کمشنر کو ضلع بھر میں صفائی کے لیے دستیاب وسائل اور فیلڈ عملے کی تعیناتی کے حوالے سے بریفنگ دی۔
اجلاس کے دوران ڈپٹی کمشنر میر رضا اوزگن نے ہدایت کی کہ فیلڈ عملے کی نگرانی کو مزید مؤثر بنایا جائے اور کوڑے کے ڈھیروں کو فوری طور پر ٹھکانے لگانے کے لیے زیرو ویسٹ پالیسی پر عملدرآمد یقینی بنایا جائے۔ انہوں نے کہا کہ مین بازاروں اور عوامی مقامات پر صفائی کے نظام کی باقاعدہ مانیٹرنگ کی جائے تاکہ شہریوں کو کسی قسم کی دشواری کا سامنا نہ کرنا پڑے۔
انہوں نے ایڈیشنل ڈپٹی کمشنر ریونیو سنیہ صافی، اسسٹنٹ کمشنر آفتاب اشرف اور چیف آفیسر ضیاء اللہ رانجھا کو ہدایت کی کہ وہ اپنے اپنے علاقوں میں فیلڈ عملے کی کڑی نگرانی کریں اور روزانہ کی بنیاد پر صفائی سے متعلق رپورٹ پیش کریں۔
ڈپٹی کمشنر نے مزید کہا کہ وزیراعلیٰ پنجاب کے "صاف ستھرا پنجاب” وژن کی تکمیل کے لیے صفائی کے انتظامات میں مزید بہتری لانا ضروری ہے اور اس سلسلے میں کسی قسم کی غفلت برداشت نہیں کی جائے گی۔ اجلاس کے اختتام پر تمام نمائندگان نے یقین دہانی کرائی کہ شہر میں صفائی کے معیار کو بہتر بنانے کے لیے تمام وسائل بروئے کار لائے جائیں گے اور عوامی شکایات کا فوری ازالہ کیا جائے گا۔
