جہلم: کمشنر راولپنڈی ڈویژن سلمان غنی کی زیرِ صدارت ضلعی انتظامیہ کے افسران اور مختلف محکموں کے سربراہان کا اہم اجلاس منعقد ہوا، جس میں ڈپٹی کمشنر جہلم میر رضا اوزگن بھی شریک تھے۔
اجلاس کے دوران ضلع جہلم میں جاری مختلف ترقیاتی منصوبوں، انتظامی امور، محکمانہ کارکردگی، عوامی سہولیات اور حکومت پنجاب کے جاری پروگرامز کے حوالے سے تفصیلی بریفنگ لی گئی۔ مختلف محکموں کے سربراہان نے اپنے متعلقہ محکموں کی کارکردگی، جاری منصوبوں کی پیش رفت، مقررہ اہداف اور عوام کو فراہم کی جانے والی سہولیات سے متعلق کمشنر راولپنڈی ڈویژن کو آگاہ کیا۔
اجلاس میں جاری ترقیاتی منصوبوں کی پیش رفت، کام کے معیار، رفتار اور مقررہ مدت کے اندر تکمیل سمیت مختلف انتظامی امور کا تفصیلی جائزہ لیا گیا۔ کمشنر سلمان غنی نے متعلقہ محکموں کی کارکردگی کا جائزہ لیتے ہوئے ہدایت کی کہ جاری منصوبوں میں معیار کو ہر صورت برقرار رکھا جائے اور کام کی رفتار مزید تیز کی جائے تاکہ منصوبے مقررہ مدت میں مکمل ہو سکیں۔
کمشنر راولپنڈی ڈویژن نے افسران کو ہدایت کی کہ حکومت پنجاب کی ترجیحات اور جاری فلاحی و ترقیاتی پروگرامز پر مؤثر عملدرآمد یقینی بنایا جائے، مقررہ اہداف بروقت حاصل کیے جائیں اور شہریوں کو سرکاری خدمات کی فراہمی میں مزید بہتری لائی جائے۔
انہوں نے کہا کہ ضلعی انتظامیہ اور تمام متعلقہ محکمے باہمی رابطہ کاری کو مزید مؤثر بنائیں تاکہ عوامی مسائل کا فوری حل، ترقیاتی منصوبوں کی بروقت تکمیل اور شہریوں کو بہتر سہولیات کی فراہمی یقینی بنائی جا سکے۔
کمشنر سلمان غنی نے افسران پر زور دیا کہ عوامی فلاح سے متعلق حکومتی اقدامات کے ثمرات نچلی سطح تک پہنچانے کے لیے فیلڈ میں مؤثر نگرانی اور مسلسل رابطہ کاری کو یقینی بنایا جائے۔
