ملٹری کالج جہلم کے کیڈٹس کی روس میں بین الاقوامی ملٹری اسپورٹس کونسل کے کھیلوں میں شرکت

روس میں پہلی بار پاکستان ملٹری کے کیڈٹس نے بین الاقوامی ملٹری اسپورٹس کونسل کے کھلیوں میں شرکت کی ہے۔

پاکستان سفارتخانہ روس کے مطابق پہلی بار 3 ملٹری کالجوں کے کیڈٹس پر مشتمل پاکستانی کھیلوں کا دستہ بین الاقوامی ملٹری اسپورٹس کونسل کے زیرانتظام کھیلوں میں حصہ لے رہا ہے۔

سفارتخانے نے بتایا ہے کہ بین الاقوامی ملٹری اسپورٹس کونسل روس کے شہر تولا میں متعدد کھیلوں کے مقابلوں کروا رہی ہے، جس کی افتتاحی تقریب گزشتہ روز منعقد ہوئی۔

سفارتخانے کے مطابق افتتاحی تقریب میں روسی نائب وزیر دفاع ایورو یونیس بیک بطور مہمان خصوصی شریک ہوئے، جبکہ روسی فیڈریشن میں پاکستان کے دفاعی اتاشی بریگیڈیئر محمد آصف خان نے بھی تقریب میں شرکت کی۔

سفارتخانے نے بتایا کہ پاکستانی وفد میں ملٹری کالج جہلم، ملٹری کالج مری اور ملٹری کالج سوئی کے 3 افسران اور 15 کیڈٹس شامل ہیں۔

سفارتخانے نے بتایا کہ کھیلوں کے مقابلوں میں بہت سے ٹریک ایونٹس، والی بال، باسکٹ بال اور باکسنگ کے مقابلے شامل ہوں گے۔

سفارتخانے کے مطابق کھیلوں کی تقریبات 24 جون سے 30 جون 2024 تک منعقد کی جائیں گی۔