دینہ میں خاتون اور دو معصوم بچوں کی ہلاکت کا معاملہ معمہ بن گیا، تہرے قتل کی ایف آئی آر درج، نماز جنازہ ادا کر دی گئی. ۔
تفصیلات کے مطابق جہلم کی تحصیل دینہ کے علاقے آڑا بڈھار (خورد) میں ماں اور دو معصوم بچوں کی ہلاکت کے معاملے نے سنگین رخ اختیار کر لیا ۔ پولیس نے واقعہ کی ایف آئی آر چچا زاد بھائی کی مدعیت میں بچوں کے والد سہیل محمود کے خلاف درج کر لی۔
پولیس کے مطابق مقتولہ کے چچازاد بھائی مدعی مقدمہ شہزاد خرم اسحاق ولد محمد اسحاق نے الزام عائد کیا ہے کہ سہیل محمود نے اپنی بیوی اور دو معصوم بچوں کو دانستہ طور پر زہر دے کر قتل کیا اور موقع سے فرار ہو گیا۔ مقدمہ زہر خورانی اور قتل کی دفعات کے تحت درج کیا گیا ہے۔
@jhelumupdates جہلم: دینہ میں ماں اور 2 معصوم بچوں کا معاملہ #JhelumUpdates #LatestNews #fyp #breakingnews #foryoupagе #viralvideos #newsupdate ♬ original sound – Jhelum Updates
جاں بحق ہونے والوں کی شناخت 32 سالہ حاجرہ بی بی، 7 سالہ بیٹا محمد قاسم اور 5 سالہ بیٹی زینب کے ناموں سے ہوئی ہے۔ گزشتہ روز تینوں کی لاشیں گھر کے ایک کمرے سے برآمد ہوئیں جس پر شبہ ظاہر کیا گیا کہ ہلاکتیں زہریلی چیز کھانے سے ہوئی ہیں۔ اہل محلہ کے مطابق واقعے سے ایک روز قبل میاں بیوی میں جھگڑا بھی ہوا تھا۔
پولیس کے مطابق ملزم سہیل محمود پیشے کے لحاظ سے ٹیکسی ڈرائیور ہے، جو واقعے کے بعد سے لاپتہ ہے اور اس کا موبائل فون بھی مسلسل بند جا رہا ہے۔ پولیس نے ملزم کی تلاش کے لیے خصوصی ٹیم تشکیل دے دی ہے جبکہ حکام کا کہنا ہے کہ اصل حقائق پوسٹمارٹم رپورٹ اور مزید تفتیش کے بعد ہی سامنے آئیں گے۔
دوسری جانب ماں اور دو بچوں کی نماز جنازہ ادا کر دی گئی۔ نماز جنازہ کے موقع پر جب میتیں گھر سے اٹھائی گئیں تو کہرام مچ گیا۔ عزیز و اقارب اور اہل علاقہ غم سے نڈھال نظر آئے اور ہر آنکھ اشکبار ہو گئی۔ نماز جنازہ کے بعد تینوں کو سینکڑوں سوگواروں کی موجودگی میں آہوں اور سسکیوں کے ساتھ مقامی قبرستان میں سپرد خاک کر دیا گیا۔
علاقے کی فضا تاحال سوگوار ہے جبکہ پولیس کی جانب سے مقدمے کی مزید تفتیش جاری ہے۔
