جہلم پولیس کی اہم کارروائی کے دوران قتل کے مقدمے میں مطلوب اشتہاری مجرم کو گرفتار کر لیا گیا۔
تفصیلات کے مطابق ڈی پی او جہلم طارق عزیز سندھو کی ہدایت پر ایس ایچ او تھانہ صدر اور ان کی ٹیم نے کارروائی کرتے ہوئے 2012 سے قتل کے مقدمے میں مطلوب اشتہاری مجرم کو گرفتار کر لیا۔
پولیس کے مطابق گرفتار مجرم سے پسٹل 30 بور بمعہ ایمونیشن بھی برآمد کر لیا گیا ہے۔ مجرم طویل عرصے سے پولیس کو قتل کے ایک مقدمے میں مطلوب تھا اور گرفتاری سے بچنے کے لیے مسلسل روپوش تھا۔
تھانہ صدر پولیس نے جدید سائنٹفک طریقۂ کار کو استعمال کرتے ہوئے ملزم کا سراغ لگایا اور کامیاب کارروائی کے دوران اسے گرفتارکیا۔
ڈی پی او جہلم طارق عزیز سندھو نے بتایا کہ اشتہاری مجرمان کے خلاف ضلع بھر میں بھرپور کریک ڈاؤن جاری ہے اور کسی بھی مجرم کو قانون کی گرفت سے بچنے نہیں دیا جائے گا۔
