جہلم: ریسکیو 1122 نے اپریل 2025 میں 2292 افراد کو ریسکیو کیا۔
تفصیلات کے مطابق ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی صدارت میں ماہانہ کارکردگی اجلاس منعقد ہوا، جس میں اپریل 2025 کے دوران کیے گئے ریسکیو آپریشنز کا تفصیلی جائزہ پیش کیا گیا۔
اجلاس کے مطابق ریسکیو 1122 جہلم کو ماہ اپریل میں مجموعی طور پر 2313 ایمرجنسی کالز موصول ہوئیں، جن پر بروقت رسپانس دیتے ہوئے 2292 افراد کو ریسکیو کیا گیا۔
کارکردگی رپورٹ کے مطابق ریسکیو ٹیم نے 1471 مریضوں کو ابتدائی طبی امداد فراہم کر کے ہسپتال منتقل کیا، جب کہ افسوسناک طور پر 64 افراد مختلف ایمرجنسیز میں جان کی بازی ہار گئے، جن میں اکثریت میڈیکل ایمرجنسیز کی تھی۔
- 390 روڈ ٹریفک حادثات
- 1569 میڈیکل ایمرجنسیز
- 71 آتشزدگی کے واقعات
- 27 کرائم کیسز
- 2 ڈوبنے اور 2 عمارت گرنے کے واقعات
- 252 متفرق ایمرجنسیز
ریسکیو 1122 نے اپنی روایت کو برقرار رکھتے ہوئے 7 اعشاریہ 8 منٹ کے اوسط رسپانس ٹائم کے ساتھ خدمات سرانجام دیں۔
ڈسٹرکٹ ایمرجنسی آفیسر نے بتایا کہ کمیونٹی سیفٹی پروگرام کے تحت مختلف اسکولز، کالجز اور اداروں میں فرسٹ ایڈ اور فائر سیفٹی ٹریننگز کا انعقاد کیا گیا جبکہ یونین کونسل سطح پر کمیونٹی ایمرجنسی ریسپانس ٹیمز کی تشکیل بھی جاری ہے۔ نوجوانوں کے لیے CADRE سکاؤٹس ٹریننگ بھی منعقد کی جا رہی ہے۔
علاوہ ازیں، پیشنٹ ٹرانسفر سروس کے تحت ضلع جہلم سے 83 مریضوں کو راولپنڈی، اسلام آباد اور سرگودھا کے بڑے ہسپتالوں میں منتقل کیا گیا تاکہ وہ بہتر طبی سہولیات سے مستفید ہو سکیں۔
انجینئر سعید احمد نے ریسکیورز کی کارکردگی کو سراہتے ہوئے کہا کہ “ریسکیو 1122 جہلم کی ٹیم ہر لمحہ عوام کی خدمت اور کسی بھی ناگہانی صورتحال سے نمٹنے کے لیے تیار ہے، اور ان کی پیشہ ورانہ لگن قابلِ تحسین ہے۔”
