جہلم: ایک پروقار تقریب میں جہلم کی مشہور فلاحی تنظیم” کیپٹن معظم فاؤنڈیشن” کو اس کے فلاحی کاموں کے اعتراف میں تعریفی سند سے نوازا گیا۔
سرٹیفکیٹ چیئرمین برائے یوتھ اسمبلی فار ہیومن رائٹس ضلع جہلم عبدالغفور چوہان اور مرکزی صدر بابر سلہری نے کیپٹن معظم فاؤنڈیشن کے چیئرپرسن ملک بدر سعید اور ان کی ٹیم کے اراکین کو کیپٹن معظم فاؤنڈیشن ملٹی اسکل حب سنٹر جہلم میں واقع ان کے دفتر میں نوازا۔
سرٹیفکیٹ ایک غیر سرکاری تنظیم کیپٹن معظم فاؤنڈیشن کی جانب سے فراہم کردہ شاندار فلاحی خدمات کے اعتراف میں دیا گیا جس کا مقصد پاکستان میں پسماندہ کمیونٹیز کو بااختیار بنانا ہے۔ کیپٹن معظم فاؤنڈیشن اس وقت کیپٹن معظم ہسپتال میں 4000 مستحق خاندانوں کو مفت ادویات فراہم کر رہی ہے۔
الصادق ووکیشنل سکول برائے خواتین میں خواتین کو سلائی اور زیورات جیسی پیشہ ورانہ تربیت فراہم کر رہی ہے اور اپنے ملٹی اسکل ہب سنٹر میں مختلف عمر کے لوگوں کو روزگار کے ساتھ مختلف ہنر فراہم کر رہی ہے۔ کیپٹن معظم فاؤنڈیشن پورے پاکستان میں متعدد فلاحی پراجیکٹس بھی کر رہی ہے جن میں صاف پانی، ڈیزاسٹر مینجمنٹ، بے گھر افراد کے لیے رہائش، یتیموں کی امداد اور بہت کچھ شامل ہے۔
بدر سعید نے یوتھ اسمبلی فار ہیومن رائٹس اور جہلم کے صدر کی تعریف اور حمایت پر شکریہ ادا کیا اور کہا کہ کیپٹن معظم فاؤنڈیشن لگن اور ہمدردی کے ساتھ عوام کی خدمت جاری رکھے گی۔
یاد رہے کہ کیپٹن معظم ہسپتال اور کیپٹن معظم فاؤنڈیشن ڈاکٹر میجر(ر) محمد یوسف اختر نے اپنے بیٹے کیپٹن معظم علی شہید کے نام پر قائم کیا ہے۔کیپٹن معظم علی شہید عین عالم شباب میں دنیا کے سرد ترین محاذ “سیاچن”پر بھارتی افواج کے خلاف بڑی بہادری سے مقابلہ کرتے ہوئے جام شہادت نوش کر گئے تھے۔
اس موقع پر یاسر مختار خان (پروجیکٹ منیجر)، حسن مجتبیٰ (اکیڈمک انچارج)، عابد ملک (ایڈمن)، وحید بٹ (سپروائزر) بھی موجود تھے اور چیئرپرسن کے ہمراہ سرٹیفکیٹ وصول کیا۔ انہوں نے یوتھ اسمبلی فار ہیومن رائٹس اور جہلم کے صدر کا شکریہ ادا کیا کہ ان کی کاوشوں کو سراہتے ہوئے انہیں معاشرے کی فلاح و بہبود کے لیے مزید محنت کرنے کی ترغیب دی۔
