جہلم: وزیر مملکت بلال اظہر کیانی نے کہا کہ مسیحی برادری ہمارے بہن بھائی ہیں اور ملکی ترقی میں ان کا نمایاں کردار ہے۔ ان کی خوشیوں میں شریک ہو کر دلی مسرت محسوس ہو رہی ہے۔
وفاقی وزیر مملکت برائے خزانہ و ریلوے بلال اظہر کیانی نے جہلم کی تحصیل دینہ کے علاقے بڑل منگلا کینٹ کے فیتھ بائبل چرچ میں مسیحی برادری کے ہمراہ کرسمس کا کیک کاٹنے کی تقریب سے خطاب کرتے ہوئے کہا کہ کرسمس صرف ایک مذہبی تہوار نہیں بلکہ محبت، رواداری اور انسانیت کا پیغام ہے، اور کرسچن کمیونٹی ہمیشہ پیار اور بھائی چارہ فراہم کرتی رہی ہے۔
تقریب میں کرسچن کمیونٹی کے معززین، مذہبی رہنما اور سیاسی و سماجی شخصیات کے علاوہ شہریوں کی کثیر تعداد نے شرکت کی۔
بعد ازاں بلال اظہر کیانی نے توشہ خانہ ٹو کے فیصلے پر میڈیا سے گفتگو کرتے ہوئے کہا کہ یہ فیصلہ آئین و قانون کے مطابق آیا ہے۔ ان کے مطابق وفاقی جیولری سیٹ کی چوری قومی خزانے کو نقصان پہنچانے کی ایک واضح مثال ہے۔ انہوں نے الزام عائد کیا کہ عمران خان اور بشریٰ بی بی نے اعلیٰ منصب پر فائز رہتے ہوئے یہ جرم کیا۔
وزیر مملکت نے مزید کہا کہ 2018 سے 2022 تک ملک پر مسلط کیے گئے شخص کی ترجیحات قومی مفادات کے بجائے ذاتی مفادات تھیں۔ گھڑی اور جیولری سیٹ کی چوری اور 190 ملین پاؤنڈ عوام کی جیب سے نکال کر دوستوں کو فائدہ پہنچانا قومی خیانت کے مترادف ہے۔
انہوں نے کہا کہ ریاستِ مدینہ کے دعوے کرنے والے شخص نے سیاسی مخالفین پر جھوٹے مقدمات قائم کر کے انہیں جیلوں میں ڈالا جبکہ خود احتساب سے بچنے کے لیے ملک کو شدید نقصان پہنچایا۔ کبھی اداروں پر حملے کیے گئے، کبھی نو مئی کے واقعات، اور کبھی سائفر کو بنیاد بنا کر ملک کو بدنام کیا گیا۔
بلال اظہر کیانی نے کہا کہ برطانیہ کی نیشنل کرائم ایجنسی نے 190 ملین پاؤنڈ پاکستانی حکومت کو واپس کیے جبکہ توشہ خانہ ٹو کیس میں عدالت نے شواہد طلب کیے مگر متعلقہ شخص عدالت میں شواہد پیش کرنے میں ناکام رہا۔ آخر میں وفاقی وزیر نے زور دے کر کہا کہ پاکستان میں کوئی بھی شخص قانون سے بالاتر نہیں ہے اور سب کے لیے احتساب یقینی بنایا جائے گا۔
