جہلم: افواجِ پاکستان کی بے مثال قربانیوں، آپریشن بنیان المرصوص اور معرکۂ حق کو ایک سال مکمل ہونے کے موقع پر ڈپٹی کمشنر جہلم میر رضا اوزگن کی ہدایت پر اسسٹنٹ کمشنر جہلم آفتاب اشرف کی زیر نگرانی ایک پروقار ریلی اور سیمینار کا انعقاد کیا گیا۔
تقریب کا مقصد قومی یکجہتی، حب الوطنی اور ریاستی اداروں سے وابستگی کو فروغ دینا اور عوام میں شعور و آگاہی پیدا کرنا تھا۔ اس موقع پر سابق رکن صوبائی اسمبلی چوہدری ندیم خادم، ڈی ایس پی سٹی محمد اکرم، چیف آفیسر میونسپل کمیٹی/ڈسٹرکٹ کونسل ضیاء اللہ رانجھا، سول ڈیفنس کور، تاجر برادری اور سیاسی و سماجی شخصیات سمیت بڑی تعداد میں افراد نے شرکت کی۔
ریلی کے دوران شرکاء نے قومی یکجہتی، امن اور استحکام کے حق میں نعرے لگائے اور افواجِ پاکستان کے ساتھ غیر متزلزل وابستگی کا اظہار کیا، جبکہ سیمینار میں مقررین نے معرکۂ حق اور آپریشن بنیان المرصوص کی تاریخی کامیابیوں، دفاعِ وطن میں کردار اور قومی سلامتی میں ان کی اہمیت پر تفصیلی روشنی ڈالی۔
مقررین نے کہا کہ پاکستان ایک پرامن ملک ہے لیکن اپنی خودمختاری اور قومی سلامتی کے تحفظ کے لیے ہر وقت تیار ہے۔ انہوں نے افواجِ پاکستان کو وطن کی مضبوط ڈھال قرار دیتے ہوئے کہا کہ پوری قوم ان کے ساتھ سیسہ پلائی دیوار کی طرح کھڑی ہے۔
تقریب میں دشمنانِ وطن کے لیے واضح پیغام دیا گیا کہ پاکستان کی افواج، ریاستی ادارے اور عوام مکمل اتحاد کے ساتھ موجود ہیں اور کسی بھی جارحیت کا بھرپور جواب دیا جائے گا۔ آخر میں شرکاء نے “پاکستان زندہ باد” کے فلک شگاف نعرے لگاتے ہوئے وطن کی سلامتی اور خودمختاری کے تحفظ کے عزم کا اعادہ کیا۔
