جہلم: عید کے موقع اور چھٹیوں میں منافع خور بے لگام رہا، پرائس کنٹرول مجسٹریٹس کی عدم موجودگی کے باعث فارمی مرغی کے گوشت کی قیمتوں میں ریکارڈ اضافہ کیا گیا، فارمی مرغی کا گوشت 780 روپے ساڑھے 7 سو گرام کے حساب سے فروخت ہوتا رہا۔
شہر میں برائلر گوشت کی قیمتیں مرغی کا گوشت فروخت کرنے والوں نے آسمانوں پر پہنچا دیں۔ عید کے دنوں میں برائلر مرغی کا گوشت فروخت کرنے والے دکانداروں نے انتظامیہ کی عدم موجودگی کا فائدہ اٹھاتے ہوئے من مرضی کے نرخ وصول کرنے کے ساتھ ساتھ شہریوں کی جیبوں کا صفایا کیا ۔ بااثر دکانداروں نے چاند رات سے عید کی چھٹیوں کے اختتام تک مرغی کا گوشت من مرضی کے نرخ مقرر کرکے مذہبی تہوار کا خوب فائدہ اٹھایا۔
مرغی کا گوشت فروخت کرنے والے دکانداروں نے فارمی مرغی کا گوشت 780روپے ساڑھے 7 سو گرام کے حساب سے فروخت کیا۔ جس کے باعث سفید پوش ،محنت کش دیہاڑی دار طبقہ کے لئے مرغی کا گوشت کھانا ناممکن رہا ،مرغی کا گوشت فروخت کرنے والوں نے خود ساختہ طور پر قیمتوں میں اضافہ کرکے لوٹ مار کا بازار گرم کئے رکھا جبکہ پرائس کنٹرول مجسٹریٹس عید کی چھٹیوں کے نام پر خاموشی اختیار کئے رکھی۔
شہری، سماجی، رفاعی، فلاحی تنظیموں کے عمائدین نے وزیراعلیٰ پنجاب مریم نواز شریف اور چیف سیکرٹری پنجاب سے مطالبہ کیاہے کہ جہلم شہر میں نافذ جنگل کے قانون کے خاتمے کے لئے فرض شناس ، ایماندار افسران کو پرائس کنٹرول مجسٹریٹس کی ذمہ داریاں سونپی جائیں تاکہ گراں فروشی کا خاتمہ ممکن ہو سکے۔
