پنڈدادن خان میں آوارہ کتوں کے حملے سے درجنوں مویشی ہلاک ہو گئے جبکہ متعدد مویشی زخمی ہوئے ہیں۔
جہلم کی تحصیل پنڈ دادن خان کے علاقہ پنڈی سیدپور میں ڈیرہ میاں ارشد پر بندھے درجنوں گائے، بکریوں اور دیگر مویشیوں کو ‘دو درجن سے زائد آوارہ کتوں’ نے حملہ کر کے شدید نقصان پہنچایا۔ کتوں نے کئی مویشیوں کو چیڑ پھاڑ دیا، جس سے کسانوں کو بھاری مالی نقصان اٹھانا پڑا۔
علاقہ مکینوں کا کہنا ہے کہ آوارہ کتے پہلے بھی کئی مویشیوں کو نقصان پہنچا چکے ہیں، لیکن تاحال انتظامیہ نے کوئی اقدامات نہیں کیے۔
متاثرین نے ضلعی انتظامیہ اور متعلقہ حکام سے اپیل کی ہے کہ وہ فوری طور پر آوارہ کتوں کے خاتمے کے لیے موثر کارروائی کریں تاکہ آئندہ ایسے واقعات کی روک تھام ہو سکے۔ شہریوں نے خبردار کیا کہ اگر بروقت اقدامات نہ کیے گئے تو بڑے نقصانات کا سامنا کرنا پڑ سکتا ہے۔
