ایف آئی اے امیگریشن نے بھائی کے پاسپورٹ پر اسپین سے پاکستان پہنچنے والے مسافر کو گرفتار کرلیا۔
تفصیلات کے مطابق ایف آئی اے امیگریشن نے سیالکوٹ ایئرپورٹ پر کارروائی کرتے ہوئے بھائی کے پاسپورٹ پر اسپین سے سیالکوٹ پہنچنے والے مسافر کو گرفتار کرلیا۔
ایف آئی اے ترجمان کے مطابق ملزم کی تصویر اور پاسپورٹ پر لگی تصویر مختلف تھی، ملزم کا نام محمد سفیان ہے جبکہ وہ اپنے بھائی عبداللہ کے پاسپورٹ پر سفر کرکے سیالکوٹ پہنچا تھا۔
ترجمان کا بتانا ہے کہ ملزم غیر قانونی طریقے سے بارڈر پار کر کے یورپ گیا تھا، ملزم یورپ میں قانونی دستاویزات حاصل کرنے میں ناکام رہا جس کے بعد واپس پاکستان آنے کیلئے بھائی کا پاسپورٹ استعمال کیا۔
ترجمان ایف آئی اے کا کہنا ہے کہ ملزم کو مزید قانونی کارروائی کیلئے انسداد انسانی اسمگلنگ سرکل گوجرانوالہ منتقل کر دیا۔
