جہلم شہر سمیت ملحقہ علاقوں میں سوئی گیس کی ظالمانہ لوڈ شیڈنگ کا سلسلہ جاری، گھروں میں خواتین کا کچن چلانا مشکل ہونے لگا، ناشتہ اوررات کا کھانا بنانے کے اوقات کار میں سوئی گیس کی لوڈ شیڈنگ کا سلسلہ بند نہ ہوسکا، مجبور اًسڑکوں پر نکلنا ہوگا، صارفین سوئی گیس نے سوئی نادرن گیس پائپ لائن کے ارباب اختیار کو خبردار کردیا۔
تفصیلات کے مطابق جہلم شہر سمیت ملحقہ علاقوں میں پچھلے ماہ سے سوئی گیس کی لوڈ شیڈنگ کا سلسلہ شروع ہو چکا ہے۔ صارفین نے ممبر قومی اسمبلی بلال اظہر کیانی سے نوٹس لینے اور سوئی گیس کی لوڈشیڈنگ ختم کروانے کا مطالبہ کرتے ہوئے کہا کہ سوئی نادرن گیس پائپ لائن کی جانب سے ظالمانہ لوڈ شیڈنگ کا سلسلہ شروع ہے جس کی وجہ سے گھریلو خواتین کو علی الصبح اور رات کا کھانا تیار کرنے میں شدید دشواری کا سامنا کرنا پڑتا ہے۔
دوسری طرف ذرائع کے مطابق گیس کی یہ لوڈ شیڈنگ صرف جہلم ریجن میں ہورہی ہے جس کی وجہ سے عوامی حلقوں میں شدید اضطراب پایا جا تا ہے۔
سوئی گیس صارفین کا کہنا ہے کہ صبح کے وقت سوئی گیس نہ ہونے کی وجہ سے طلبہ و طالبات اور ملازمت پیشہ افراد کو ناشتہ نہیں ملتا۔ لوڈ شیڈنگ کی وجہ سے خواتین کو کھانا بنانے میں شدید مشکلات کا سامنا کرنا پڑرہا ہے۔ ہوٹلوں سے کھانا خریدنے کی وجہ سے گھریلو بجٹ بری طرح متاثر ہورہے ہیں ۔
سوئی گیس صارفین نے سوئی نادرن گیس پائپ لائن کے ارباب اختیار اور جہلم سے منتخب ممبر قومی اسمبلی بلال اظہر کیانی سے سوئی گیس کی لوڈشیڈنگ کو ختم کروانے کا مطالبہ کیاہے کہ تاکہ صارفین کو پیش آنے والی مشکلات کا خاتمہ ممکن ہو سکے ۔
