سوہاوہ اور گردونواح میں شدید بارش اور ژالہ باری کے باعث کئی علاقے زیر آب آ گئے، جبکہ سردی کی شدت میں بھی اضافہ ہو گیا۔
تفصیلات کے مطابق ضلع جہلم میں گزشتہ چند روز سے بارش کا سلسلہ جاری ہے جبکہ جمعہ کے روز دوپہر کو سوہاوہ کے نواحی علاقوں پدھری، مغل آباد، فتح پور اور ججیال میں شدید ژالہ باری ہوئی۔ ژالہ باری اور مسلسل بارش کے باعث نشیبی علاقے پانی میں ڈوب گئے، جس سے عوام کو مشکلات کا سامنا کرنا پڑا۔
شدید بارش اور ژالہ باری کے بعد سردی کی لہر میں مزید اضافہ ہو گیا، جس کی وجہ سے لوگوں نے گرم کپڑے اور ہیٹر دوبارہ نکال لیے۔ تاہم بارش کے باعث شہریوں نے سکھ کا سانس بھی لیا اور اللہ تعالیٰ کا شکر ادا کیا کہ یہ بارش موسم کی سختیوں کے بعد رحمت کا باعث بنی۔
مقامی زمینداروں کا کہنا ہے کہ ژالہ باری سے کچھ فصلوں کو نقصان پہنچنے کا اندیشہ ہے جبکہ دوسری طرف بارش کی وجہ سے بعض علاقوں میں پانی کی قلت کا مسئلہ بھی حل ہونے کی امید ہے۔
