پنڈدادنخان: جلالپور شریف پولیس نے اہم کارروائی کرتے ہوئے علی رضا عرف رضو گینگ کے 2 ملزمان کو گرفتار کر لیا۔
تفصیلات کے مطابق جہلم کی تحصیل پنڈدادنخان میں تھانہ جلالپور شریف پولیس نے ایک اہم کارروائی کرتے ہوئے چوری کی متعدد وارداتوں میں ملوث علی رضا عرف رضو گینگ کے سرغنہ سمیت 2 ملزمان کو گرفتار کر لیا۔
ذرائع کے مطابق پولیس نے ملزمان کے قبضہ سے چوری شدہ 2 عدد بکریاں اور 13 ہزار 500 روپے نقدی برآمد کر کے عوام کی محفوظ واپسی یقینی بنائی۔ ملزمان سے برآمدگی کا کل تخمینہ 58 ہزار 500 روپے بنتا ہے، جو شہریوں کے قیمتی اثاثوں کا حصہ تھا۔
تھانہ جلالپور شریف کی ٹیم نے ملزمان کے خلاف ٹھوس شواہد حاصل کیے ہیں اور انہیں عدالت میں پیش کرنے کی تیاری کر رہی ہے تاکہ قرار واقعی سزا دلائی جا سکے۔
ڈسٹرکٹ پولیس آفیسر جہلم طارق عزیز سندھو نے کہا کہ شہریوں کے قیمتی اثاثوں سے محروم کرنے والے ملزمان کسی رعایت کے مستحق نہیں ہیں اور پولیس کی کارروائیاں جاری رہیں گی تاکہ جرائم پیشہ عناصر کے خلاف قانون کی حکمرانی قائم رہے۔
