اس کرہ ارض پر اللہ کریم نے تمام مخلوقات کو انسان کی خدمت پر مامور کر رکھا ہے، جو دن رات اشرف المخلوقات کی خدمت میں مصروف ہیں۔ ظاہری نعمتوں کے ساتھ ساتھ باطنی نعمتوں کے حصول اور رہنمائی کے لیے اللہ کریم نے انبیائے کرام مبعوث فرمائے، جو ہمیں اس دنیا سے آگے کی زندگی اور حقیقت سے آگاہ کرتے ہیں۔ اللہ کریم خالق ہیں اور وہی بہتر جانتے ہیں کہ کس مخلوق کو کیا مقام اور کتنی استعداد عطا کرنی ہے۔ اگر ہمیں اتنی نعمتیں عطا ہوئی ہیں تو سوال یہ ہے کہ ہم ان کے جواب میں اللہ تعالیٰ کا شکر کس طرح ادا کر رہے ہیں اور کیا ہم واقعی اس کے احکامات کی اتباع کر رہے ہیں؟
ان خیالات کا اظہار امیر عبدالقدیر اعوان شیخ سلسلہ نے مرکز دارالعرفان منارہ میں منعقدہ دو روزہ ماہانہ روحانی اجتماع سے واشنگٹن (امریکہ) سے ویڈیو لنک کے ذریعے خطاب کرتے ہوئے کیا۔انہوں نے کہا کہ رب کائنات نے ہمیں کیفیاتِ قلبی سے منسلک فرمایا ہے، جو اللہ کریم کا بہت بڑا احسان ہے۔ یہ بات تو ہر شخص جانتا ہے کہ ایک دن اس دنیا سے رخصت ہونا ہے، لیکن اصل بات یہ ہے کہ اس حقیقت کا ادراک انسان کو ایسی قوت عطا کرے جو اسے عملی زندگی میں بھی نظر آئے۔ دینی امور ہوں یا دنیاوی معاملات، بندۂ مومن کے لیے یہ مناسب نہیں کہ وہ زبان سے کچھ کہے اور اس کے دل و دماغ میں کچھ اور ہو۔
انہوں نے مزید کہا کہ بعض اوقات ایسا بھی دیکھنے میں آتا ہے کہ انسان دین کی بات تو بیان کر رہا ہوتا ہے، لیکن اس کے اندر دین کے مطابق وہ کیفیت موجود نہیں ہوتی اور وہ خود اس پر عمل نہیں کر رہا ہوتا۔ اگر انسان اپنے عمل کی اصلاح نہ کرے تو اسے غور کرنا چاہیے کہ وہ گرتے گرتے کہاں تک پہنچ سکتا ہے۔ کیفیاتِ قلبی انسان کو ایسی ترقی عطا کرتی ہیں کہ اسے اپنی حقیقت اور مقام کا ادراک حاصل ہوتا ہے اور وہ اپنا محاسبہ خود کرنے کے قابل ہو جاتا ہے کہ میں کس مقام پر کھڑا ہوں۔
امیر عبدالقدیر اعوان نے کہا کہ ذکر و اذکار، لطائف اور مراقبات کی بات ہو تو ہمیشہ اپنا معاملہ اللہ کریم کے سپرد رکھیں۔ جہاں انسان اپنی ذات کو درمیان میں لاتا ہے، وہاں غلطی کا امکان پیدا ہو جاتا ہے۔ چاہے کوئی ذمہ دار ہو یا سالک، ہم میں سے ہر شخص امتحان گاہ میں ہے اور ہر ایک کے لیے ضروری ہے کہ زندگی کی آخری سانس تک محتاط رہے۔
انہوں نے شکر گزاری کی اہمیت پر روشنی ڈالتے ہوئے کہا کہ جب معاملہ ذاتِ باری تعالیٰ کا ہو تو اس میں اپنی ذات کو شامل نہیں کرنا چاہیے۔ جہاں یہ سوچ پیدا ہو جائے کہ یہ سب میرا کمال ہے، وہاں تمام محنت اور کوشش بے معنی ہو جاتی ہے۔ بظاہر ایک چھوٹی سی سوچ بھی انسان کے لیے بہت بڑا امتحان بن سکتی ہے۔
انہوں نے دعا کی کہ اللہ کریم ہمیں صحیح شعور عطا فرمائیں اور صدقِ دل سے دین پر عمل پیرا ہونے کی توفیق نصیب فرمائیں۔
اجتماع کے اختتام پر امیر عبدالقدیر اعوان نے امتِ مسلمہ اور وطنِ عزیز پاکستان کی سلامتی، ترقی اور خوشحالی کے لیے خصوصی دعا بھی فرمائی۔
