سوہاوہ: گورنمنٹ ایسوسی ایٹ کالج سوہاوہ کی طالبات کو درپیش سفری مشکلات کے حل کے لیے پرنسپل کی کاوش رنگ لے آئی۔
وزیراعلیٰ پنجاب مریم نواز شریف کے دورہ جہلم کے موقع پر پرنسپل گورنمنٹ ایسوسی ایٹ کالج سوہاوہ نے ان کے ہمراہ آنے والے صوبائی وزیر تعلیم رانا سکندر حیات سے ملاقات کی اور کالج کی طالبات کے لیے پنک بس فراہم کرنے کا مطالبہ پیش کیا۔
صوبائی وزیر تعلیم رانا سکندر حیات نے پرنسپل کے مطالبے کو منظور کرتے ہوئے فوری طور پر بس فراہم کرنے کے احکامات جاری کر دیے، جس کے نتیجے میں محض دو روز کے اندر گورنمنٹ ایسوسی ایٹ کالج سوہاوہ کو پنک بس فراہم کر دی گئی۔
پنک بس کی فراہمی سے کالج میں زیرِ تعلیم طالبات کو آمدورفت کے لیے محفوظ اور آسان سفری سہولت میسر آئے گی۔ بالخصوص دور دراز علاقوں سے کالج آنے والی طالبات کو پبلک ٹرانسپورٹ کی عدم دستیابی اور روزمرہ سفر کے دوران پیش آنے والی مشکلات سے نجات ملنے کی امید ہے۔
اس سہولت سے نہ صرف طالبات کے لیے کالج آنا جانا آسان ہوگا بلکہ ان کے والدین کی پریشانی میں بھی کمی آئے گی۔ کالج کے حلقوں اور عوامی و سماجی حلقوں کی جانب سے پرنسپل کی مؤثر کاوش اور صوبائی وزیر تعلیم رانا سکندر حیات کے فوری احکامات کو سراہا جا رہا ہے۔
