پنڈدادنخان: زبیر اختر بھدر نے کہا کہ ٹریفک پولیس جہلم عوام کی خدمت اور ٹریفک قوانین پر عملدآمد کروانے کے لیے کوشاں ہے،ٹریفک قوانین پر عملدرآمد کروانا ہمارا فرض ہے، عوام تعاون کرتے ہوئے قانون شکنی سے پرہیز کرے۔
ڈی ایس پی ٹریفک جہلم زبیر اختر بھدر نے صحافیوں سے گفتگو کرتے ہوئے کہا کہ حادثات اور ٹریفک قوانین کی خلاف ورزی کی روک تھام کے لیے والدین کم عمر بچوں کو گاڑی یا موٹر سائیکل دینے سے اجتناب کریں تاکہ کم عمر بچے حادثات سے محفوظ رہیں۔
زبیر اختر بھدر نے کہا کہ ڈرائیونگ لائسنس کے حصول میں عوامی مشکلات کو مدنظر رکھتے ہوئے سہولیات فراہم کرنے کے لئے مزید آسانیاں پیدا کرنے کی مثبت کوشش کررہے ہیں تاکہ لوگ زیادہ سے زیادہ ڈرائیونگ لائسنس کی سہولت سے مستفید ہوسکیں۔ ٹریفک پولیس جہلم کو عوام سے نرمی برتنے اور اخلاق سے پیش آنے کی ہدایات کی ہیں عوام بھی پولیس سے تعاون اور قانون کی عملداری کو یقینی بنائیں تاکہ مسائل میں کمی واقع ہو۔
ڈی ایس پی ٹریفک پولیس نے کہا ہےکہ پولیس اہلکاروں سے متعلقہ عوامی شکایات سننے اور ازالہ میں کردار ادا کرنے کے لئے میرا دفتر ہرخاص وعام کے لئے کھلا ہے۔ موٹر سائیکل سواروں کے لئے ہیلمٹ کا استعمال اور گاڑی چلاتے وقت سیٹ بیلٹ کا استعمال ضروری قرار دینے کا مقصد دوران حادثات سنگین نوعیت کے نقصانات سے بچاناہے۔
انہوں نے کہا کہ ٹریفک پولیس جہلم اوورلوڈنگ پہ قابو پانے کےلیے مزید محنت اور لگن سے کام کرے اور فرائض کو عوامی خدمات اور عبادت سمجھ کر انجام دیں تاکہ اوور لوڈنگ سمیت قانون شکن عناصر پر قابو پایا جاسکے۔
