سوہاوہ: جہلم پولیس نے جرائم پیشہ عناصر کے خلاف بڑی کارروائیاں کرتے ہوئے4 ملزمان کو گرفتار کر لیا۔
تفصیلات کے مطابق ڈی پی او جہلم شفیق احمد چوہدری کی خصوصی ہدایات پر ضلع بھر میں جرائم پیشہ اور قانون شکن عناصر کے خلاف کریک ڈاؤن جاری ہے۔ اس سلسلے میں تھانہ ڈومیلی اور تھانہ سوہاوہ پولیس نے مختلف کارروائیوں کے دوران 4 ملزمان کو گرفتار کر کے اسلحہ، منشیات اور شراب برآمد کر لی۔
تھانہ ڈومیلی پولیس نے ایس ایچ او کی قیادت میں کارروائی کرتے ہوئے ناجائز اسلحہ رکھنے والے 2 ملزمان کو گرفتار کر لیا۔ پولیس نے ملزمان کے قبضے سے ایک عدد رائفل 12 بور، ایک عدد پسٹل 30 بور معہ ایمونیشن برآمد کر کے الگ الگ مقدمات درج کر لیے۔
دوسری جانب تھانہ سوہاوہ پولیس نے کارروائی کرتے ہوئے ایک مبینہ شراب سپلائر کو گرفتار کر لیا، جس کے قبضے سے 30 لیٹر شراب برآمد ہوئی۔
اسی طرح ایک اور کارروائی میں منشیات فروشی میں ملوث ملزم کو گرفتار کر کے اس کے قبضے سے 1 کلو 180 گرام ہیروئن برآمد کر لی گئی۔ پولیس حکام کے مطابق ملزم کو ٹھوس شواہد کے ساتھ عدالت میں پیش کیا جائے گا تاکہ اسے قرار واقعی سزا دلوائی جا سکے۔
ڈی پی او جہلم شفیق احمد چوہدری نے کہا ہے کہ ناجائز اسلحہ رکھنے والوں، منشیات فروشوں اور دیگر جرائم پیشہ عناصر کے خلاف بلاامتیاز کارروائیاں جاری رہیں گی۔ انہوں نے کہا کہ منشیات فروش معاشرے کا ناسور ہیں اور ضلع جہلم کو جرائم سے پاک کرنا پولیس کی اولین ترجیح ہے۔
