پنڈدادنخان: تھانہ للِہ کے علاقے احمد آباد پتن کے قریب دن دیہاڑے اسلحہ کے زور پر شہری سے مبینہ طور پر ایک لاکھ 20 ہزار روپے چھین کر فرار ہونے والے تین مبینہ ڈاکوؤں کو للِہ پولیس نے بروقت کارروائی کرتے ہوئے تعاقب کے بعد گرفتار کر لیا۔
تفصیلات کے مطابق جہلم کی تحصیل پنڈدادنخان میں احمد آباد پتن کے قریب تین مسلح افراد نے مبینہ طور پر ایک شہری کو اسلحہ کی نوک پر یرغمال بنایا اور اس سے ایک لاکھ 20 ہزار روپے چھین کر فرار ہونے کی کوشش کی۔ واقعے کی اطلاع ملتے ہی راجہ محمد علی خان آف احمد آباد نے للِہ پولیس کے ہمراہ ملزمان کا تعاقب شروع کر دیا۔
پولیس اور شہری کی مشترکہ کوششوں کے نتیجے میں مبینہ ملزمان کو احمد آباد پتن کے قریب ہی گھیر لیا گیا اور اسلحہ سمیت گرفتار کر لیا گیا۔ پولیس نے ملزمان کے قبضے سے اسلحہ تحویل میں لے لیا جبکہ دورانِ تفتیش ایک ہونڈا 125 موٹر سائیکل بھی برآمد کی گئی۔
پولیس کے مطابق ابتدائی طور پر شبہ ظاہر کیا جا رہا ہے کہ برآمد ہونے والی موٹر سائیکل تھانہ بھیرہ کے علاقے میں پیش آنے والی ایک ڈکیتی کی واردات کے دوران چھینی گئی تھی۔ پولیس نے موٹر سائیکل اور اسلحہ قبضے میں لے کر گرفتار ملزمان سے مزید تفتیش شروع کر دی ہے۔
پولیس حکام کے مطابق تفتیش کے دوران ملزمان کے دیگر وارداتوں میں ملوث ہونے اور ان کے ممکنہ ساتھیوں کے بارے میں بھی معلومات حاصل کی جا رہی ہیں۔
اہلِ علاقہ نے ڈکیتی کی اطلاع پر فوری کارروائی کرتے ہوئے ملزمان کو گرفتار کرنے پر ایس ایچ او تھانہ للہ طارق محمود اور پولیس ٹیم کی کارکردگی کو سراہا ہے۔ شہریوں کا کہنا ہے کہ بروقت کارروائی سے نہ صرف مبینہ ملزمان قانون کی گرفت میں آئے بلکہ جرائم پیشہ عناصر کو بھی واضح پیغام ملا ہے کہ قانون شکنوں کو کسی صورت کھلی چھوٹ نہیں دی جائے گی۔
پولیس نے گرفتار ملزمان کے خلاف قانونی کارروائی شروع کر دی ہے جبکہ واقعے کی مزید تفتیش جاری ہے۔
