جہلم شہر سمیت ضلع بھر میں قصابوں نے سرکاری نرخنامے کو یکسر نظر انداز کر دیا، گائے اور بکرے کے گوشت کی قیمتیں اپنی من مانی کے مطابق مقرر کر کے عوام کو لوٹنے کا سلسلہ جاری ہے۔
تفصیلات کے مطابق قصابوں نے انتظامیہ کی جانب سے جاری کردہ سرکاری نرخنامہ محض دکانوں پر آویزاں کرنے کے لیے رکھا ہوا ہے جبکہ حقیقت میں وہ گوشت اپنی مرضی کے نرخوں پر فروخت کر رہے ہیں۔
سرکاری نرخنامے کے مطابق گائے کے گوشت کی قیمت 800 روپے فی کلو مقرر کی گئی ہے، مگر بازار میں یہ 1000 سے 1200 روپے فی کلو میں فروخت ہو رہا ہے۔ اسی طرح بکرے کے گوشت کا سرکاری نرخ 1600 روپے فی کلو مقرر ہے، لیکن قصاب 2000 سے 2200 روپے فی کلو تک وصول کر رہے ہیں۔
قصابوں کی اس من مانی نے نہ صرف انتظامیہ بلکہ پرائس کنٹرول مجسٹریٹ کو بھی کھلا چیلنج دے رکھا ہے جبکہ شہر بھر میں سرکاری نرخوں پر گوشت فروخت نہ ہونے کی شکایات عام ہو گئی ہیں۔ شہریوں نے اس کھلی لوٹ مار کے خلاف سخت احتجاج کرتے ہوئے ڈپٹی کمشنر سے فوری نوٹس لینے کا مطالبہ کیا ہے۔
شہری حلقوں کا کہنا ہے کہ مقامی انتظامیہ اور پرائس کنٹرول مجسٹریٹس کو فوری طور پر کارروائی کرنی چاہیے اور ان من مانی نرخوں پر گوشت فروخت کرنے والوں کے خلاف سخت ایکشن لینا چاہیے تاکہ عوام کو ریلیف فراہم کیا جا سکے۔
