جہلم: ڈپٹی کمشنر جہلم میر رضا اوزگن کی ہدایات پر ضلع بھر میں جاری امتحانات کے دوران اسسٹنٹ کمشنرز نے اپنی متعلقہ تحصیلوں میں قائم امتحانی مراکز کا دورہ کیا اور انتظامات کا تفصیلی جائزہ لیا۔
دوروں کے دوران امتحانی مراکز میں سکیورٹی انتظامات، شفافیت، امتحانی ماحول، طلبہ کو فراہم کی جانے والی سہولیات اور امتحانی ضابطہ کار پر عملدرآمد کا معائنہ کیا گیا۔ اس موقع پر متعلقہ عملے اور امتحانی مراکز کے ذمہ داران سے بریفنگ بھی لی گئی۔
اسسٹنٹ کمشنرز نے امتحانی مراکز کے سربراہان کو ہدایت کی کہ امتحانات کے انعقاد میں شفافیت، میرٹ اور نظم و ضبط کو ہر صورت یقینی بنایا جائے اور نقل کی روک تھام کے لیے تمام ضروری اقدامات مؤثر انداز میں جاری رکھے جائیں۔
انہوں نے کہا کہ طلبہ کو سازگار، پرامن اور منصفانہ امتحانی ماحول فراہم کرنا ضلعی انتظامیہ کی اولین ترجیح ہے، تاکہ تمام امیدوار یکساں مواقع کے ساتھ امتحانات میں شرکت کر سکیں۔
ضلعی انتظامیہ کی جانب سے امتحانی مراکز کی مسلسل مانیٹرنگ جاری ہے جبکہ متعلقہ افسران کو ہدایت کی گئی ہے کہ وہ امتحانی عمل کے دوران کسی بھی قسم کی بے ضابطگی، نقل یا قواعد و ضوابط کی خلاف ورزی پر فوری کارروائی کو یقینی بنائیں۔
ڈپٹی کمشنر جہلم میر رضا اوزگن نے کہا ہے کہ امتحانات کے شفاف انعقاد کے لیے تمام دستیاب وسائل بروئے کار لائے جا رہے ہیں اور امتحانی عمل کو مکمل میرٹ، شفافیت اور نظم و ضبط کے ساتھ پایۂ تکمیل تک پہنچایا جائے گا تاکہ تعلیمی معیار کو مزید بہتر بنایا جا سکے۔
