جہلم: کمشنر راولپنڈی ڈویژن کا سول ہسپتال جہلم کا دورہ، میڈیکل ٹیسٹوں کیلئے مریضوں کو پرائیویٹ لیبارٹری بھیجنے پر میڈیکل آفیسر جبکہ غفلت برتنے پر 2 خواتین فارماسسٹ اور ہیڈ نرس کو معطل کر دیا۔
تفصیلات کے مطابق کمشنر راولپنڈی ڈویژن انجینئر عامر خٹک نے ڈپٹی کمشنر جہلم سیدہ رملہ علی کے ہمراہ گزشتہ روز ڈسٹرکٹ ہیڈ کوارٹر ہسپتال جہلم کا دورہ کیا جہاں مریضوں نے شکایات کے انبار لگا دیئے۔
سول ہسپتال جہلم میں میڈیکل ٹیسٹوں کے لیے مریض کو پرائیویٹ لیبارٹری بھیجنے پر کمشنر راولپنڈی ڈویژن انجینئر عامر خٹک نے میڈیکل آفیسر ڈاکٹر امجد علی کو معطل کر کے انکوائری کا حکم جاری کیا۔
کمشنر راولپنڈی ڈویژن انجینئر عامر خٹک کے دورے کے دوران مریض نے شکایت کی کہ ڈاکٹر امجد نے نجی لیب سے ٹیسٹ کروانے کی ہدایت کی ہے، مریض نے نجی لیب سے 2100 روپے ٹیسٹ کروائے، انکوائری مکمل ہونے تک ڈاکٹر امجد علی کو معطل کردیا گیا۔
کمشنر راولپنڈی ڈویژن انجینئر عامر خٹک نے غفلت برتنے پر دو فارماسسٹ عظمی شہزادی اور گلشن بتول جبکہ ہیڈ نرس نور فاطمہ کو معطل کر کے مزید انکوائری کا حکم دے دیا۔
فارمیسی اسٹاف کے بغیر اطلاع ادویات سینٹر بند کرنے پر فی میل اسٹاف جبکہ شام کی شفٹ کی ہیڈ نرس بغیر منظوری چھٹی کرنے پر معطل کی گئیں۔
ڈسٹرکٹ ہیڈ کوارٹر ہسپتال جہلم کےمیڈیکل سپرنٹنڈنٹ نے میڈیکل آفیسر، فارماسسٹ اور ہیڈ نرس کو معطل کرنے کا نوٹیفکیشن جاری کر دیا۔ معطل اسٹاف کے خلاف پیڈا ایکٹ تحت انکوائری کا حکم جاری کیا گیا جبکہ انکوائری مکمل ہونے تک تمام اسٹاف معطل رہے گا۔
اس حوالے سے ڈپٹی کمشنر جہلم سیدہ رملہ علی کا کہنا ہے کہ شہریوں کو سہولت نہ دینے پر کوئی رعایت نہیں برتی جائے گی، ڈیوٹی میں غفلت پر کوئی لاپرواہی برداشت نہیں جائے گی ۔
