جہلم: ڈپٹی کمشنر جہلم میر رضا اوزگن کی زیر صدارت ایک اہم اجلاس منعقد ہوا جس میں پرائس کنٹرول مجسٹریٹس کی ماہِ نومبر کی کارکردگی کا تفصیلی جائزہ لیا گیا۔
اجلاس میں مجسٹریٹس کی جانب سے عوام کو ریلیف فراہم کرنے کے لیے اٹھائے گئے اقدامات اور مارکیٹ کی موجودہ صورتِ حال کا بھی احاطہ کیا گیا۔
ڈپٹی کمشنر میر رضا اوزگن نے نومبر کی کارکردگی کو مجموعی طور پر تسلی بخش قرار دیتے ہوئے مجسٹریٹس کی کوششوں کو سراہا، تاہم انہوں نے یہ بھی واضح کیا کہ ابھی مزید بہتری کی بڑی گنجائش موجود ہے۔
انہوں نے ہدایت کی کہ پرائس کنٹرول کا عمل صرف فائلوں یا رپورٹوں تک محدود رہنے کے بجائے عملی طور پر مارکیٹ میں نظر آنا چاہیے تاکہ عوام کو حقیقی ریلیف مل سکے۔
انہوں نے اس بات پر زور دیا کہ اشیائے ضروریہ کی قیمتوں میں استحکام یقینی بنانے کے لیے مؤثر اور سخت اقدامات اٹھائے جائیں تاکہ روزمرہ استعمال کی اشیاء عوام کو سرکاری نرخنامے کے مطابق دستیاب ہو سکیں۔
ڈپٹی کمشنر نے عزم ظاہر کیا کہ ضلعی انتظامیہ مہنگائی پر قابو پانے اور عوامی ریلیف کے لیے تمام وسائل بروئے کار لائے گی۔
