جہلم شہر اور گرد و نواح میں بارش کا سلسلہ تیسرے روز بھی جاری رہا، جس سے موسم خوشگوار ہو گیا اور حبس میں نمایاں کمی واقع ہوئی۔ گرمی اور حبس سے پریشان شہریوں کے چہرے بارش کے بعد کھل اٹھے اور لوگوں نے سکھ کا سانس لیا۔
بارش شروع ہوتے ہی شہر کے متعدد علاقوں میں آئیسکو کی جانب سے بجلی کی سپلائی معطل کر دی گئی، جس سے شہریوں کو مشکلات کا سامنا کرنا پڑا۔ بجلی کی بندش کے باعث گھریلو امور، کاروبار اور دیگر معمولات زندگی متاثر ہوئے۔
محکمہ موسمیات کے مطابق آئندہ 24 گھنٹوں کے دوران وقفے وقفے سے مزید بارش کا امکان ہے۔ شہریوں کو ہدایت کی گئی ہے کہ وہ بارش کے دوران احتیاطی تدابیر اختیار کریں، خاص طور پر نشیبی علاقوں میں رہنے والے افراد چوکس رہیں۔
