پنڈدادنخان میں ناجائز تجاوزات کے خلاف مقامی انتظامیہ نے آپریشن کرتے ہوئے متعدد کمرشل بورڈ اور شیڈ گرا دیے۔
تفصیلات کے مطابق وزیر اعلیٰ پنجاب کے ویژن "تجاوزات سے پاک پنجاب” پر عمل درآمد کے لیے ضلعی انتظامیہ متحرک ہے اور اس سلسلے میں ڈپٹی کمشنر جہلم میثم عباس کے حکم پر اسسٹنٹ کمشنر پنڈدادنخان نادیہ پروین کی زیر نگرانی آپریشن دوسرے روز بھی جاری رہا۔
پنڈدادنخان میں ناجائز تجاوزات کے خلاف مقامی انتظامیہ کا آپریشن جاری ہے جس میں متعدد کمرشل بورڈ اور شیڈ گرا دیے گئے ہیں۔ ریلوے روڈ، کھیوڑہ روڈ، جہلم روڈ اور کھیوڑہ میں بھاری مشینری کی مدد سے دکانوں کے باہر سے تجاوزات، کمرشل بورڈ اور شیڈز ہٹا دیے گئے۔
اس آپریشن کے خلاف انجمن تاجران کی کال پر شہر میں جزوی ہڑتال کی گئی، اس دوران تاجروں نے کشمیر چوک میں احتجاج بھی کیا۔ اس موقع پر پولیس کی بھاری نفری جس میں ڈی ایس پی عامر شاہین گوندل بھی شامل تھے موقع پر پہنچ گئی تاکہ صورتحال کو قابو کیا جا سکے۔
بعد ازاں مرکزی انجمن تاجران نے گورنمنٹ پنجاب کے احکامات پر عمل درآمد کرتے ہوئے تجاوزات خود ختم کرنے کا اعلان کر دیا۔ اس کے ساتھ ہی انتظامیہ نے دکانوں کے باہر دو فٹ تک کی لائن لگانے کی ہدایت جاری کی۔
اسسٹنٹ کمشنر پنڈدادنخان نادیہ پروین نے میڈیا سے گفتگو کرتے ہوئے کہا کہ وزیر اعلیٰ پنجاب مریم نواز کے ویژن کے تحت تجاوزات سے پاک پنجاب کے احکامات پر بلا تفریق عمل درآمد کروایا جا رہا ہے تاکہ شہر کو بہتر اور منظم بنایا جا سکے۔
ان کا کہنا تھا کہ اس آپریشن کا مقصد شہریوں کو بہتر سہولتیں فراہم کرنا اور قانونی تقاضوں کو پورا کرنا ہے۔
