سوہاوہ: عمران خان اور ان کی اہلیہ بشریٰ بی بی کے خلاف 190 ملین پاؤنڈ کیس کا فیصلہ سنائے جانے کے بعد القادر یونیورسٹی سوہاوہ پر پولیس کی بھاری نفری تعینات کردی گئی۔
راولپنڈی کی احتساب عدالت نے 190 ملین پاؤنڈ کیس میں عمران خان کو 14 اور ان کی اہلیہ بشریٰ بی بی کو 7 سال قید کی سزا سنائی ہے جب کہ عدالت نے القادر یونیورسٹی سوہاوہ کو وفاقی حکومت کی تحویل میں دینے کا بھی حکم دیا ہے۔
عدالتی فیصلے کے بعد سوہاوہ میں القادر یونیورسٹی کے باہر پولیس کی بھاری نفری تعینات کردی گئی ہے جب کہ طلبا و طالبات یونیورسٹی کے اندر اور ہاسٹل میں موجود ہیں۔
پولیس کا کہنا ہےکہ یونیورسٹی میں امن و امان کی صورتحال کا جائزہ لینے آئے ہیں۔
میڈیا سے گفتگو کرتے ہوئے طلبہ نے کہا کہ ہم یہاں پڑھائی کے لیے ہاسٹل میں ٹھہرتے ہیں لہٰذا کسی کیس کی وجہ سے ہمارا مستقبل خراب نہیں ہونا چاہیے۔
