جہلم: ڈپٹی کمشنر جہلم میر رضا اوزگن نے ڈسٹرکٹ ایجوکیشن آفس کا اچانک دورہ کیا، جہاں انہوں نے محکمہ تعلیم کے انتظامی امور، دفتری کارکردگی اور تعلیمی نظام سے متعلق مختلف معاملات کا تفصیلی جائزہ لیا۔
دورے کے موقع پر چیف ایگزیکٹو آفیسر (سی ای او) ایجوکیشن نازیہ شہزادی نے ڈپٹی کمشنر کو ضلع بھر کے تعلیمی انتظامات، اساتذہ اور دفتری عملے کی حاضری، زیرِ تکمیل ترقیاتی منصوبوں اور محکمہ تعلیم کی مجموعی کارکردگی کے حوالے سے تفصیلی بریفنگ دی۔
ڈپٹی کمشنر نے دفتر کے مختلف شعبوں کا معائنہ کرتے ہوئے دفتری ریکارڈ، فائلوں کی بروقت تکمیل اور عوامی شکایات کے ازالے کے لیے کیے گئے اقدامات کا باریک بینی سے جائزہ لیا۔ انہوں نے متعلقہ افسران کو ہدایت کی کہ تمام دفتری امور کو شفاف، مؤثر اور مقررہ وقت کے اندر نمٹایا جائے تاکہ شہریوں کو بروقت سہولیات فراہم کی جا سکیں۔
میر رضا اوزگن نے کہا کہ محکمہ تعلیم میں انتظامی شفافیت، جوابدہی اور بہترین کارکردگی کو ہر صورت یقینی بنایا جائے۔ انہوں نے واضح کیا کہ فرائض کی انجام دہی میں کسی بھی قسم کی غفلت، سستی یا لاپروائی برداشت نہیں کی جائے گی۔
ڈپٹی کمشنر نے مزید ہدایت کی کہ ضلع کے تمام سرکاری اسکولوں میں بنیادی سہولیات کی فراہمی، طلبہ کے لیے سازگار تعلیمی ماحول اور جاری ترقیاتی منصوبوں کی بروقت تکمیل کو یقینی بنایا جائے تاکہ تعلیمی معیار میں مزید بہتری لائی جا سکے۔
