جہلم: 27 ستمبر کے احتجاج کی کال کے تناظر میں ضلع جہلم میں پاکستان تحریک انصاف کے سرگرم کارکنوں اور مبینہ مالی معاونین کے خلاف کارروائیوں کا سلسلہ تیز ہونے کی اطلاعات سامنے آئی ہیں۔
ذرائع کے مطابق مختلف مقامات پر ممکنہ احتجاجی سرگرمیوں میں کردار ادا کرنے والے افراد کی نگرانی بھی بڑھا دی گئی ہے۔
ذرائع کا کہنا ہے کہ جی ٹی ایس چوک جہلم اور منگلا بائی پاس کے قریب بعض دکانیں سیل کر دی گئی ہیں جبکہ احتجاج میں ممکنہ طور پر سرگرم کردار ادا کرنے والے پاکستان تحریک انصاف کے بعض کارکنوں کی نقل و حرکت اور سرگرمیوں پر بھی نظر رکھی جا رہی ہے۔
ذرائع کے مطابق احتجاج کے حوالے سے روپوش ہونے والے بعض کارکنوں کے گھروں سے متعلق معلومات بھی اکٹھی کی جا رہی ہیں۔ مبینہ طور پر بعض گھروں کے نقشہ جات اور دیگر متعلقہ ریکارڈ کی بھی جانچ پڑتال کی جا رہی ہے۔
ذرائع کا مزید کہنا ہے کہ پولیس اور متعلقہ ادارے 27 ستمبر کے احتجاج کے حوالے سے ممکنہ سرگرمیوں پر کڑی نظر رکھے ہوئے ہیں، جبکہ بعض کارکنوں اور مبینہ طور پر مالی معاونت فراہم کرنے والے افراد کے بارے میں بھی معلومات حاصل کی جا رہی ہیں۔
دوسری جانب ان کارروائیوں کے حوالے سے سرکاری سطح پر تاحال کوئی تفصیلی موقف سامنے نہیں آیا۔ انتظامیہ اور پولیس کا موقف سامنے آنے کے بعد صورتحال مزید واضح ہو سکے گی۔
