جہلم: ماہ مقدس کے فیوض و برکات ہمارے لیے باعثِ رحمت ہیں، اللہ تعالیٰ ہمیں رمضان المبارک کی برکتوں سے زیادہ سے زیادہ مستفید ہونے کی توفیق عطا فرمائے۔
ان خیالات کا اظہار پیر سید ریاض حسین شاہ خطیب اعظم مدنی جامعہ مسجد نئی آبادی کھرالہ نے صحافیوں سے گفتگو کرتے ہوئے کیا۔ انہوں نے کہا کہ رمضان المبارک اللہ تعالیٰ کی طرف سے امتِ مسلمہ کے لیے ایک عظیم انعام ہے۔ اس مقدس مہینے میں اللہ تعالیٰ شیاطین کو جکڑ دیتا ہے اور جنت کے دروازے کھول دیے جاتے ہیں۔ روزے کا اجر اللہ تعالیٰ نے خود دینے کا وعدہ کر رکھا ہے، جو اس کی بے پایاں رحمت کا مظہر ہے۔
پیر سید ریاض حسین شاہ نے مزید کہا کہ رمضان المبارک گناہوں کی بخشش کا بہترین موقع فراہم کرتا ہے اور ہمیں چاہیے کہ اس بابرکت مہینے کی رحمتوں سے زیادہ سے زیادہ فائدہ اٹھائیں۔ نیکیوں کا یہ موسمِ بہار ہمیں دوسروں کی مدد اور ان کے دکھ درد میں شریک ہونے کا درس دیتا ہے۔
انہوں نے کہا کہ رمضان المبارک اور عید الفطر جیسے مقدس مواقع پر مستحق افراد کو اپنی خوشیوں میں شریک کرنا سب سے افضل عبادت ہے۔ یہ مہینہ ہمیں محبت، اخوت اور ایثار کا پیغام دیتا ہے، اور ہمیں چاہیے کہ اس پیغام پر عمل کرتے ہوئے معاشرتی بھلائی کے لیے اپنا کردار ادا کریں۔
