جہلم: صحافی معاشرے میں مسائل کی نشاندہی اور ان کے حل کے لیے بے لوث خدمات انجام دے رہے ہیں۔ میڈیا کا درست اور ذمہ دارانہ کردار ملکی ترقی کی ضمانت ہے۔ صحافی اصلاحِ معاشرہ میں پیش آنے والی ہر رکاوٹ کا ڈٹ کر مقابلہ کرتے ہیں اور سچائی پر مبنی رپورٹنگ کے ذریعے عوام تک درست معلومات پہنچانے کا اہم فریضہ انجام دیتے ہیں۔
ان خیالات کا اظہار جہلم پریس کلب کے نو منتخب صدر مہر محمد الیاس اور جنرل سیکرٹری الیاس صادق وٹو نے ڈیجیٹل میڈیا کے عہدیداران سے خصوصی گفتگو کے دوران کیا۔ انہوں نے کہا کہ صحافیوں کو چاہیے کہ وہ کسی بھی خبر کی اشاعت سے قبل اس کی مکمل تحقیق کریں تاکہ بعد میں کسی قسم کی شرمندگی کا سامنا نہ کرنا پڑے اور عوام کو مستند معلومات فراہم کی جا سکیں۔
انہوں نے کہا کہ جہلم پریس کلب میں الیکٹرانک اور پرنٹ میڈیا سے وابستہ افراد اپنی صحافتی ذمہ داریاں احسن طریقے سے ادا کر رہے ہیں۔
اس موقع پر جہلم پریس کلب کے سینئر نائب صدر ڈاکٹر اعجاز اعوان، نائب صدر مرزا قدیر بیگ، جائنٹ سیکرٹری تصور حسین چوہدری، سیکرٹری فنانس شہریار علی راجہ اور سیکرٹری اطلاعات سید ناصر محمود بھی موجود تھے۔ اجلاس میں ڈیجیٹل میڈیا کے عہدیداران اور ممبران نے جہلم پریس کلب کے نومنتخب عہدیداران کو مبارکباد پیش کی اور اپنی بھرپور حمایت کا یقین دلایا۔
