دینہ: وزیر اعلیٰ پنجاب مریم نواز شریف کے ویژن اور ڈپٹی کمشنر جہلم میر رضا اوزگن کی خصوصی ہدایات پر تحصیل دینہ میں امام مساجد کے لیے 25 ہزار روپے کے پے آرڈرز کی تقسیم کا عمل باقاعدہ طور پر شروع ہو گیا ہے۔
گزشتہ روز تحصیل دینہ میں 290 امام مساجد میں سے 234 امام مساجد کو پے آرڈرز تقسیم کر دیے گئے۔ یہ تقسیم دینہ، پنڈوری، کھوکھا، راجو پنڈی، ساہو چک اور دیگر دیہات میں کی گئی۔ اس اقدام کا بنیادی مقصد مذہبی پیشواؤں کی گرانقدر خدمات کا سرکاری سطح پر اعتراف کرنا اور ان کی معاشی معاونت کو یقینی بنانا ہے۔
اس موقع پر اسسٹنٹ کمشنر دینہ صفاء عابد نے تحصیل آفس میں امام مساجد میں پے آرڈرز تقسیم کیے جبکہ باقی ماندہ پے آرڈرز کی فراہمی کا عمل جلد مکمل کرنے کی ہدایات جاری کی گئیں۔
ڈپٹی کمشنر جہلم میر رضا اوزگن نے اس موقع پر کہا کہ اسسٹنٹ کمشنرز کو پابند کیا گیا ہے کہ وہ چاروں تحصیلوں میں پے آرڈرز کی تقسیم کے عمل کی خود نگرانی کریں تاکہ تمام حقدار امام مساجد کو ان کا اعزازیہ بغیر کسی تاخیر کے مل سکے۔
انہوں نے کہا کہ یہ اقدام بین المذاہب ہم آہنگی کے فروغ اور معاشرے کے ایک اہم طبقے کی فلاح و بہبود کی جانب مثبت قدم ہے، جس کے لیے ضلعی انتظامیہ تمام ضروری سہولیات فراہم کر رہی ہے۔
آخر میں پے آرڈرز وصول کرنے والے امام مساجد نے وزیر اعلیٰ پنجاب مریم نواز شریف اور ڈپٹی کمشنر جہلم میر رضا اوزگن کا شکریہ ادا کرتے ہوئے اس حکومتی اقدام کو سراہا اور اسے مذہبی طبقات کے احترام اور ان کی خدمات کے اعتراف کی عملی مثال قرار دیا۔
