جہلم پولیس نے ماہ جنوری کے دوران جرائم پیشہ عناصر کے خلاف بھرپور کارروائیاں کرتے ہوئے شاندار کارکردگی کا مظاہرہ کیا۔
ڈسٹرکٹ پولیس آفیسر کی قیادت میں ضلع بھر میں امن و امان برقرار رکھنے، اغوا، قتل، چوری، ڈکیتی اور منشیات کی روک تھام کے لیے سخت اقدامات کیے گئے۔ پولیس کی جانب سے مختلف کارروائیوں میں مجموعی طور پر 65 لاکھ 24 ہزار 100 روپے کا مسروقہ مال برآمد کیا گیا، جبکہ 12 جرائم پیشہ گروہوں کو گرفتار کر کے ان کے خلاف قانونی کارروائی کی گئی۔
گزشتہ ماہ ڈکیتی معہ قتل کا ایک مقدمہ درج کیا گیا، جس میں پولیس نے فوری کارروائی کرتے ہوئے ایک ملزم کو گرفتار کر لیا۔ اسی طرح، زیادتی کے تین مقدمات درج کیے گئے، جن میں سے دو ملزمان کو گرفتار کر لیا گیا، جبکہ گینگ ریپ کے دو مقدمات میں تین ملزمان قانون کی گرفت میں آئے۔
جہلم پولیس نے بڑی کامیابی حاصل کرتے ہوئے 112 اشتہاری مجرمان کو گرفتار کیا، جن میں کیٹگری "اے” کے 18 اور کیٹگری "بی” کے 64 ملزمان شامل ہیں، جبکہ 30 عدالتی مفرور بھی پکڑے گئے۔
پولیس کی بروقت کارروائیوں کے نتیجے میں ضلع بھر میں متعدد سنگین جرائم کا سدباب ممکن ہوا۔ جرائم برخلاف پراپرٹی کی مد میں 12 گینگ ٹریس کیے گئے اور 34 ملزمان کو گرفتار کیا گیا۔ ان ملزمان سے برآمد شدہ سامان میں 14 موٹر سائیکلیں، 6 پسٹل اور بھاری مقدار میں ایمونیشن شامل ہے، جبکہ مجموعی طور پر 65 لاکھ 24 ہزار 100 روپے کی برآمدگی عمل میں لائی گئی۔
منشیات کے خلاف بھی جہلم پولیس نے بھرپور کریک ڈاؤن کرتے ہوئے 49 مقدمات درج کیے اور 50 ملزمان کو گرفتار کیا۔ ان کے قبضے سے 23 کلو 409 گرام چرس، 5 کلو 830 گرام ہیروئن، 7 کلو 300 گرام آئس اور 407 بوتلیں شراب برآمد کی گئیں۔
غیر قانونی اسلحہ رکھنے والوں کے خلاف بھی سخت کارروائی عمل میں لائی گئی، جس کے دوران 31 مقدمات درج کر کے 32 ملزمان کو گرفتار کیا گیا۔ پولیس نے ان سے 36 پسٹل، ایک کلاشنکوف، 6 گنز/رائفلیں اور بھاری مقدار میں گولیاں برآمد کیں۔
پتنگ بازی کے خلاف مہم میں بھی جہلم پولیس نے کارروائیاں تیز کر دیں، جس کے دوران 5 مقدمات درج کیے گئے اور 5 ملزمان کو گرفتار کر کے 306 پتنگیں اور 18 ڈوریں قبضے میں لے لی گئیں۔ ماہ جنوری میں شہریوں کی سہولت کے لیے قائم خدمت مراکز سے 4621 افراد نے مختلف خدمات حاصل کیں، جبکہ ٹریفک قوانین کی خلاف ورزی پر 5548 چالان کیے گئے اور 75 لاکھ 35 ہزار 400 روپے کا جرمانہ وصول کیا گیا۔
ڈسٹرکٹ پولیس آفیسر جہلم نے عوامی مسائل کے حل کے لیے خصوصی اقدامات کیے اور ضلع بھر میں مختلف تھانوں اور دفاتر میں 37 کھلی کچہریوں کا انعقاد کیا، جہاں شہریوں کی شکایات سنی گئیں اور فوری احکامات جاری کیے گئے۔
ڈی پی او جہلم نے کہا کہ پولیس جرائم کے خاتمے، عوام کے جان و مال کے تحفظ اور انصاف کی بروقت فراہمی کے لیے ہر ممکن اقدامات کر رہی ہے۔ عوامی تعاون کے بغیر جرائم کا مکمل خاتمہ ممکن نہیں، اس لیے شہری بھی اپنی ذمہ داری نبھائیں اور مشکوک سرگرمیوں کی فوری اطلاع پولیس کو دیں۔
