منگلا: ضلع انتظامیہ میرپور کی جانب سے یومِ تشکر کے موقع پر پاک فوج سے اظہارِ یکجہتی کے لیے میرپور سے منگلا کینٹ تک عظیم الشان ریلی کا انعقاد کیا گیا۔
اس قومی جذبے سے لبریز ریلی میں ہزاروں افراد نے اپنی گاڑیوں اور موٹر سائیکلوں سمیت بھرپور شرکت کی۔
ریلی میں میرپور کے اعلیٰ سرکاری افسران، سیاسی و سماجی رہنماؤں، تاجر برادری، طلبہ اور عام شہریوں کی کثیر تعداد نے شرکت کر کے پاک فوج کے ساتھ بھرپور یکجہتی کا مظاہرہ کیا۔ شرکاء نے ہاتھوں میں قومی پرچم اٹھا رکھے تھے اور "پاکستان زندہ باد، پاک فوج زندہ باد” کے فلک شگاف نعرے لگا کر اپنے جذبات کا بھرپور اظہار کیا۔
منگلا کینٹ پہنچنے پر پاک فوج کے افسران نے ریلی کے شرکاء کا پرتپاک استقبال کیا۔ افسران نے شرکاء سے خطاب کرتے ہوئے ان کی شرکت کو سراہا اور شکریہ ادا کیا۔ ان کا کہنا تھا کہ یہ کامیابی صرف پاک فوج کی نہیں بلکہ پوری قوم کی ہے۔ عوام کا اعتماد اور تعاون ہی اصل طاقت ہے جو دفاعِ وطن کو ناقابل تسخیر بناتا ہے۔
اس موقع پر برگیڈیئر احمد مدنی نے شرکاء سے خطاب کرتے ہوئے کہا کہ "بزدل دشمن نے رات کے اندھیرے میں بزدلانہ کارروائی کرنے کی کوشش کی، لیکن ہم نے اس کے دانت کھٹے کر دیے۔ افواجِ پاکستان اور عوام نے ایک ٹیم کی طرح دشمن کا ڈٹ کر مقابلہ کیا اور اللہ تعالیٰ کے فضل و کرم سے ہمیں کامیابی حاصل ہوئی۔ پاکستان ہمیشہ زندہ و تابندہ رہے گا۔”
ریلی کا مقصد وطنِ عزیز کی سلامتی کے محافظوں کے ساتھ اظہارِ یکجہتی اور ان کی خدمات کو خراجِ تحسین پیش کرنا تھا، جسے عوام نے پورے جوش و خروش کے ساتھ منایا۔
