جہلم: پبلک ٹرانسپورٹ اور سکول وین میں نصب گیس سلنڈرز شہریوں کے لیے مسلسل خطرہ بن گئے، آئے روز حادثات کی بڑی وجہ قرار۔ عوام نے متعلقہ محکموں کی غفلت پر شدید تشویش کا اظہار کرتے ہوئے حکومت سے فوری کارروائی کا مطالبہ کر دیا۔
تفصیلات کے مطابق شہریوں نے سکول وین اور پبلک ٹرانسپورٹ میں گیس سلنڈرز کی موجودگی پر گہری تشویش ظاہر کی ہے۔ ان کا کہنا ہے کہ گیس سلنڈرز کے باعث ٹرانسپورٹ میں آئے روز خطرناک حادثات رونما ہو رہے ہیں، جس سے قیمتی جانوں کے ضیاع اور مالی نقصان کا سامنا کرنا پڑ رہا ہے۔
شہریوں نے کہا کہ متعلقہ اداروں کی لاپرواہی اور غفلت کے باعث عوام کو جان لیوا خطرات کا سامنا ہے، جس پر فوری توجہ دینے کی ضرورت ہے۔
عوام نے وزیر اعلیٰ پنجاب مریم نواز سے اپیل کی ہے کہ وہ اس سنگین مسئلے پر سخت اقدامات کریں اور پبلک ٹرانسپورٹ میں گیس سلنڈرز کے استعمال پر فوری پابندی عائد کریں تاکہ انسانی جانوں کو محفوظ بنایا جا سکے۔
شہریوں کا مطالبہ ہے کہ حکومت متعلقہ محکموں کو متحرک کرے اور فوری طور پر ٹرانسپورٹ گاڑیوں سے گیس سلنڈرز ہٹانے کے احکامات جاری کیے جائیں تاکہ مزید حادثات سے بچا جا سکے۔
