جہلم: ملک بھر کی طرح جہلم پریس کلب کے صحافیوں کی جانب سے پنجاب حکومت کے ہتک عزت قانون، پیکا ایکٹ پر احتجاج کیا گیا۔
جہلم پریس کلب، پرنٹ و الیکٹرانک میڈیا ، ڈسٹرکٹ یونین آف جرنلسٹ کے زیر اہتمام جہلم پریس کلب کے باہر صحافی سراپا احتجاج رہے۔ جہلم پریس کلب کے باہر پرامن احتجاجی مظاہرہ کیا گیا اور ہتک عزت قانون کے خلاف نعرے بازی کی گئی۔
اس موقع پر صدر جہلم پریس کلب محمد امجد بٹ نے کہا کہ آزادی اظہار رائے کے خلاف ڈکٹیٹروں کے قوانین کے خلاف بھی جدوجہد کی، موجودہ حکمرانوں کو بھی کالے قانون کو واپس لینا پڑے گا۔ صوبائی حکومت نے ہتک عزت بل پر پہلے مذاکرات کیے پھر مذاکرات کو سبوتاژ کیا۔
صدر الیکٹرانک میڈیا چوہدری عابد محمود نے کہا کہ ہتک عزت قانون کی بھرپور مذمت کرتے ہیں ، ہتک عزت قانون حکومت پنجاب کو واپس لینے کا مطالبہ کرتے ہیں۔
ڈسٹرکٹ یونین آف جرنلسٹ کے صدر چوہدری مہربان حسین نے کہا کہ پیکا قوانین اور پنجاب حکومت کے ہتک عزت قانون میں ترامیم فوری طور پر واپس لی جائیں۔
ضلع جہلم کے دیگر پریس کلبز کے صحافیوں نے بھی احتجاج کرتے ہوئے ہتک عزت بل واپس لینے کا مطالبہ کیا۔
