جہلم: سید خلیل حسین کاظمی نے کہا کہ ماہ مقدس رمضان المبارک رحمتوں اور برکتوں کے ساتھ جلوہ افروز ہو چکا ہے۔ اللہ تعالیٰ کے مہمان ماہ صیام کا شایان شان طریقے سے استقبال اور ادب و احترام کرنا چاہیے۔
معروف سیاسی، مذہبی و سماجی شخصیت سید خلیل حسین کاظمی نے جہلم پریس کلب کے صحافیوں سے گفتگو کرتے ہوئے کہا کہ ماہِ مقدس رمضان المبارک اللہ تعالیٰ کی خاص رحمت ہے، جسے شایانِ شان طریقے سے خوش آمدید کہنا اور اس کا ادب و احترام کرنا ہر مسلمان کا فرض ہے۔
انہوں نے کہا کہ امتِ محمدیہ کے لیے یہ اللہ تعالیٰ کا خصوصی انعام ہے کہ ہمیں توبہ، استغفار اور بخشش کا ایک اور سنہری موقع نصیب ہوا ہے۔ یہ ہم پر منحصر ہے کہ ہم عبادت و ریاضت کے ذریعے اللہ کی رحمت سے کتنا فیض حاصل کرتے ہیں۔ قیام اللیل، تلاوتِ قرآن، توبہ و استغفار اور ذکر و اذکار کے ذریعے ہمیں رضائے الٰہی حاصل کرنے کی کوشش کرنی چاہیے۔
سید خلیل حسین کاظمی نے مزید کہا کہ ہمیں اپنی زندگی کے ہر لمحے کو قیمتی سمجھنا چاہیے، کیونکہ کسی کو نہیں معلوم کہ زندگی کی شام کب ہو جائے۔ کتنے لوگ جو پچھلے رمضان میں ہمارے ساتھ دین و دنیا کے کاموں میں مصروف تھے، آج وہ ہمارے درمیان موجود نہیں ہیں۔ اللہ تعالیٰ نے ہمیں ایک اور موقع دیا ہے، جس سے بھرپور فائدہ اٹھانا چاہیے اور اس بابرکت مہینے میں زیادہ سے زیادہ عبادت کر کے اپنی آخرت سنوارنی چاہیے۔
